Mevsîm-i rebîʿ kudûmuyla hevâlarda güşâyiş ve ezhâr-ı behârda letâfet ü nümâyiş bedîdâr olup, verd-i mutarrây-ı gülşen-i Hılâfet ve gül-i raʿnây-ı hadîka-i Saltanat olan Şehriyâr-ı Sürûşî-menzilet “Tenakkal fe-lezzâtü'l-hevâ bi't-tenakkul" mefhûmuna işâretle taʿne-zen-i gavta-i Dımaşk ve Suğd-i Semerkand ve reşk-endâz-ı hıyâbân-zâr-ı Sıfâhân ve Nihâvend olan Top-kapu'ya nakl-i hümâyûn buyurmuşlar idi. Mahall-i mezkûrda bir müddet ârâm u huzûr ve istimâʿ-i elhân-ı bülbülân ve temâşây-ı ezâhîr-i muhtelifü'l-elvân ile kesb-i safâ vü hubûr ʿakabinde nîm-nakl ile Beşiktaş Serâyı'na dahi meyl ü iltifâtları zuhûr edüp, bir mâh kadar serây-ı mezkûrda dahi ikâmet ve yine Top-kapu'ya devlet ü şevketle ʿavdet buyurdular.