Kapudân-ı deryâ Vezîr Hüseyin Paşa hazretleri bu sene-i ʿamîmetü'l-meymenede Akdeniz cânibine ʿazîmet irâdesiyle mersây-ı Tersâne-i ʿâmire'den fekk-i lenger-i ikāmet etmişidi. Bâd-ı şurta-i Samedânî ile Suda Lîmânı furza-i merâkib-i Sultânî oldukda, korsan ihtifâsı maznûn olan Küçük-çuka Adası'na bir kıtʿa kırlangıc ve Girid verâsında vâkiʿ Gavdos Adası'na bir kıtʿa şehtiye taʿyîn edüp, muvâfık-ı rüzgâr ile zikr olunan adaya tekarrüb eylediklerinde, şikâr-ı erbâb-ı ticâret içün âmâde bir kıtʿa Malta sefînesi müşâhede olunup, fi'l-hâl iki taraf cenge mübâşeret ve düşmen-i dîn tâb-âver-i mukāvemet olamayup, sefîneyi terk ile adaya firâr eyledikleri müşârun ileyh tarafına işʿâr olundukda, firârîleri bi-eyyi-vechin kân ele getürmeleri bâbında İsfake [اسفکه = Sphakia] Mütevellîsi'ne ve iş erlerine buyuruldular tahrîr ve mezbûrlar dahi sâʿid-i gayreti teşmîr ile yirmi beş neferini tutup der-zencîr eyledikleri hâlde müşârun ileyh dahi o tarafa varup, ahz olunan kefereyi Donanma-yi hümâyûn'a taksîm ve mevsim-i deryâ fevt olduğundan ʿavdeti tasmîm edüp, işbu şehr-i Rebîʿulevvel'in dokuzuncu günü mansûr u muzaffer, mersây-ı Tersâne-i ʿâmire'ye ilkāy-ı lenger eyledi. [Ü1 34a]