Müşârun ileyh Dellâl-başı Kâtibi Seyyid Mustafa Efendi'nin mahdûmu olup, bin yüz otuz sekiz târîhinde feyz-yâb-ı vücûd ve temyîz-i bûd ve ne-bûd hılâlinde Baş-muhasebe Kalemi'ne duhûl ile az müddetde temyîz-i ziyân u sûd edüp, doksan altıda Zimmet Halîfeliği'yle ser-firâz ve bir müddet Defterdar [Ü1 32b] Kîsedârlığı'yla dahi mümtâz olup, Sadr-ı sabık İzzet Paşa Darb-hâne Emîni iken, Darb-hâne Kitâbeti mûmâ ileyhde bulunmak münasebeti ile istiʿdâd ü liyâkatini görüp, Sadr-ı vakt bulunan kayın-atası Halîl Paşa'ya zâtını taʿrîf ve doksan yedi Muharrem'inde Defterdârlık mansıb-ı celîli ile şânını tazʿîf etdirmiş idi. İhtilât u imtizâcı Sadr-ı vaktin muvâfık-ı mizâcı olduğundan, [Ü2 33b] kasd-ı takrîb ile doksan sekizde câh-1 Riyâset'le taltîf ve ʿazlinden sonra Hazînedâr ʿAli Paşa Sadâreti'nde dahi, Riyâset'de kalup, müstened-i kavî vü zaʿîf olup, iki yüz târîhinde kevkeb-i ikbâli hâbıt ve mesned-i Riyâset'den sâkıt olmuşidi. Kara Mahmûd Paşa üzerine Cezâyirli Hasan Paşa'nın taʿyîn olunmasını mukaddemâ tervîc ve esb-i me'mûriyyetini tesrîc etmişiken, müşârun ileyhe bu sırr-ı mektûmu tarafdârları haber verüp, defʿine ʿamel ve ekser ü ekall demeyüp, sarf-ı mâl ile sevk-ı bedel etdikden sonra, Sâhib-i tercemeye ʿadâvetin izmâr ve Kā'im-makāmlığı'nda ibtidâ Gelibolu'ya ve andan İstanköy'e nefy ile tekdîr ü izrâr etmişidi. Mûmâ ileyhin ehibbâsı itlâkına ihtimâm ve teshîlen li'l-maslahati ibtidâ Bodrum'da binâ olunan Sefîne Nezâreti meʾmûriyyetini iltizâm ve ol bâbda emr-i ʿâlî isdâr ve tarafına tesyâr eyledikleri hılâlde Hasan Paşa'nın Mısır'a meʾmûriyyeti vukūʿ bulup, mûmâ ileyhi ihânet yüzünden istishâb ve Mısır'a vardıklarında taʿyîn eylediği umûrda istikāmet ve reʾy-i rezînini görüp, iltifât ü nevâzişiyle hâtırından defʿ-i teşvîş ü inkılâb etmişidi. Mısır gāyilesi ber-taraf olur olmaz sefer vukūʿ bulup, müşârun ileyhin Âsitâne'ye ʿavdetiyçün istiʿcâl ve ol dahi emre imtisâl edüp, [Ü1 33a] mûmâ ileyhi maʿan Âsitâne'ye îsâl ve o hılâlde Rûznâmçe-i Evvel mansıbı ile sefere meʾmûr ve iki yüz iki Receb'inde Ordu-yi hümâyûn Edirne Sahrâsı'nda iken Çavuş-başılık ile mesrûr ve iki yüz üç Muharrem'inde tekrâr Re'îsülküttâb ve elli günden sonra Tevkīʿî ve baʿdehû [Ü2 34a] Şıkk-ı Evvel Defterdarlığı'yla kâm-yâb olup, bu mansıbdan dahi çok geçmeden maʿzûl ve Defter Emâneti'ne mevsûl ve iki yüz üç Ramazan'ında Sadrıaʿzam Kethudâlığı'yla bekâm ve Ruscuklu Hasan Paşa'nın idbârı mûmâ ileyhe sirâyet ile mazhar-ı gazab-ı Şehriyâr-ı enâm olup, Kıbrıs Cezîresi'ne tagrîb ve iki yüz altıda ʿafv ile tatrîb olunup, Âsitâne'ye vürûdunda yine Büyük Rûznâmecilik ile ferhân ve iki yüz sekizde Tuğrâ-nüvîs-i ahkâm-ı Dîvân ve iki yüz dokuzda bi'l-istîzân hacc-ı şerîfe revân olup, Mekke-i mükerreme'de vâkiʿ Şeyh Mahmûd nâm Sahrâ'da kâr ü bâr-ı ʿâlem-i fânîden katʿ-ı emel ve lebbeyk-zen-i daʿvet-i ecel oldu. Mûmâ ileyh hüsnü'l-hulk, cemîlü'l-etvâr ve küşâde-rûy ve şîrîn-güftâr, muharremâtdan müctenib ve evrâd u ezkâra müdâvemetle turuk-ı ʿaliyyeye müntesib olup, şiʿr ü inşâya mâyil ve sâde-rûlardan ancak temâşây-ı cemâle kāyil idi.