Îrâd-ı Cedîd Defterdârı Mustafa Reşîd Efendi işbu Muharremü'l-harâmın yirmi yedinci günü Sadrıaʿzam hazretlerini Şeyhülislâm Efendi cenâblarıyla çiftlik-i mezkûra daʿvet ve Defterdâr Efendi ve Rûznâmçe-i Evvel Şerîf Efendi ve Reʾîsülküttâb-ı esbak Râşid Efendi'yi Sadrıaʿzam hazretleri mazhar-ı şeref-i maʿiyyet edüp, çiftliğe vâsıl ve âsâyiş ü huzûr hâsıl [Ü1 29a] oldukdan sonra, leyl ü nehâr âzmâyiş-i ceng ü peykâr eden muʿallem askeri kānûn-i cedîd üzere icrây-ı fünûn-i harb u darb ve tertîb-i cenâh u kalb ile her tarafdan âvâze-i tahsîn ü âferîni celb eylediklerini müteʿâkıb, bast-ı havân ve tenâvül-i etʿime-i kesîretü'l-elvân kılınup, istimâʿ-ı elhân-ı mutribân ile tagdiye-i rûh-ı revân ve temâşâ-yı raks-ı perî peçe-gân ile tehyîc-i mâddetü'ş-şevk-i cinân kılındıkdan sonra, sâhib-i ziyâfete ve Veli Ağa'ya birer sevb kubûr yenli kākum iksâ ve sâyirlere dahi alâ merâtibihim hilʿâtler ilbâs ve bahşişler iʿtâ olunup, ser-germ-i ülfet ve neşvân-ı sohbet-i pür-zevk ü behcet ʿavdet olundu.