Revân ve Karabağ ve hudûda mücâvir olan sâyir hânlar vakt-i âsâyiş ve ferâğında "Menem dîger nîst" lâf ü güzâfıyla dâmen-efşân-ı ʿucb u gurûr ve bir bâdire zuhûrunda Devlet-i ʿaliyye'ye ilticâları müstemirrü'z-zuhûr olmakdan nâşî, Nâdir Şâh helâkinde hacr-i terbiyesinde endek-sâl ve giderek Zend Kerîm ve sâyirlerinin hıdmetleriyle güzârende-i eyyâm ü leyâl olan Ağa Mehmed Hân vakt-i pîrîde cihân-gîrlik sevdâsına düşüp, memâlik-i İran'ı kabza-i tasarrufuna idhâl ve Deşt-i Karabağ'da tetevvüc ile Azerbaycân semtlerine bi'n-nefs hareket eyleyeceği karâyin-i hâliyye ile istidlâl olunmağla, hudûdda vâkiʿ hânlara havf ü haşyet târî ve nâ-çâr müteşebbis-i zeyl-i merhamet-i hazret-i Tâc-dârî olduklarını Çıldır Vâlîsi ve hâlâ Erzurum Vâlîsi Vezîr Yûsuf Ziyâ Paşa hazretlerine tahrîr ve Revân ve Karabağ hânları tarafından vürûd [Ü2 26a] eden iki nefer dâd-hâhları tesyîr edüp, merkūmlar Âsitâne-i saʿâdet'e rû-mâl-i vürûd ve tahrîrâtları meşhûd olup, meʾâli istigāse vü istiʿânet ve lede'l-hâce berü tarafa ilticâ eden reʿâyâlarını kabûl ü istıshâbdan ibâret olup, Baba Hân tarafından hudûd-ı Devlet-i ʿaliyye'ye tecâvüz ü teʿaddî ve hılâf-ı rızâ harekete tesaddî vukūʿ bulmadan husamâsını [Ü1 25b] iltizâm her ne kadar feth-i bâb-ı hısâm kabîlinden ise dahi, Dergâh-ı Saltanat-ı seniyye'ye ilticâ edenleri mübtelây-ı ye's ü hirmân etmek şâyân olmayup, fi'l-hâl sügūr u tuhûmda vâkiʿ vülât ve hükkâm ve zâbitâna evâmir-i ʿaliyye ısdâr ve hudûd-ı İran'dan berü tarafa reʿâyâ geçdiği hâlde kabûl ü îvâ ve ʿavdet murâd eylediklerinde, sebîlleri ihlâ kılınmak tenbîhâtı tekrâr kılınup, Revân Hânı Hudâvendigâr-ı sâbık zemânında Mîr-i mîrânlık menşûrunu tahsîl ve bu defʿa tecdîd ü tebdîl olunmasını niyâz-nâmesine tezyîl etmiş bulunmağla, bu garazı dahi teshîl olunup, mebʿûsları makām-ı Sadâret-i ʿuzmâ'dan tahrîr olunan ecvibe ile iʿâde ve mashûben bi's-selâme vilâyetlerine îsâl olunmaları hılâl-i râhda vâkiʿ hükkâma tenbîh ü ifade olundu.