Şehzâde Câmiʿi Şeyhi olan Hamza Efendi taşrada perverde olmuş humku gālib bir şahıs olup, ʿavâm-pesend hareketler ile haylîce şöhret kesb etmişidi. Ahkâm-ı Fıkhiyye'nin hâricde tasvîri müteʿazzir olan mesâ'ilini selef-i sâlihîn “Lâ-hayâ'e fi'd-dîn” deyerek lisân ile kinâyeten ifade ede gelmişler iken, şeyh-ı merkūm lisân ile “Mes'ele beyânı mümkin değildir. Lâ-mahâle hâricde mes’ele, tasvîre ve sened, tenvîre muhtacdır” kavlinde ısrâr ve bu ahvâle dâ'ir evzâʿ ile kendüsin udhûke-i kibâr u sigār edüp, Ramazânlarda Ayasofya Câmiʿi'nde bir dâyire-i vesîʿa peydâ ve ʿavâm-ı nâsı mecbûr-ı hande-i [Ü2 22b] istihzâ eyleyerek, hetk-i nâmûs-ı şerîʿat-ı garrâ eylediği mesmûʿ-ı Şehriyâr-ı hamiyyet-âsâr olduğuna binâ'en, mûmâ ileyh li-ecli't-te'dîb maskat-ı re'si olan Konya'ya nefy ü tagrîb olundu.