Tefâsîl-i ahvâli cild-i evvelde muharrer olan İskenderiyyeli Mahmûd Paşa bir zemândan berü girîve-gerd-i vâdî-yi cünûn ve dâyire-i itâʿat ü inkıyâddan bîrûn olup, sâlik olduğu tarîk-ı vâdî-i selâmetden dûr ve etvâr-ı nâ-hemvârı bilâhare kendüyü niʿmet-i hayâtdan mehcûr eyleyeceğini tefekkür edüp, tebeʿât-ı sâbıkasından rücûʿ u istîfâ ve şimdiye dek zimmetinde terâküm eden emvâl-i mîrîyi edâ ve fîmâ-baʿd mecmûʿ-ı mürettebât-ı devleti istîfâ etmek şurûtuyla İspanya Kıralı'nı tavsît ile teşebbüs-i dâmen-i ilticâ eylediği, İspanya Maslahat-güzârı tarafından memhûr takrîr ile inhâ olunup, müşârun ileyhin hakkında vâkiʿ tedârük-i devlet bundan akdem hükm-i Şerîʿat ve tedbîr-i ehl-i meşveret ile nizâm bulmuş keyfiyyetden olduğuna binâ'en, hâne-i hazret-i Fetvâ-penâhî'de bu husûsun müzâkeresi [Ü2 18a] içün işbu Şaʿbân-ı şerîf'in onuncu günü Vezîr-i aʿzâm hazretleri ve Kapudan Paşa hazretleri ve sudûr-ı kirâm ve ricâl-i Devlet-i ebed-kıyâm hâzır olup, Maslahat-güzâr vâsıtasıyla müşârun ileyhin baʿzı zevâta vürûd eden niyâz-nâmesi [Ü1 17b] ve bu mâddeye dâ'ir kaleme alınan lâyiha ve Rumeli Vâlîsi'nin bi'l-muhâbere isticlâb olunan maʿrûzâtı cümle müvâcehesinde kırâʾat olundukda, müşârun ileyh Vezâret'i kemâ-kân tahsîl ve esbâb-ı emniyyeti tekmîl etdikden sonra, mücerreb olan televvünü hasebiyle tavrını tebdîl ve bâgīyâne evzâʿ ile hevâsına tâbiʿ olmayan tarafdârân-ı devleti izrâr u tenkîl eyleceği müsellem ise dahi, Rumeli'nin ihtilâli ve zahîrenin kılleti sebebi ile o taraf halkının ıztırâb-ı hâli maʿlûm olduğundan gayri, geçen sene gibi İskenderiyye üzerine Serʿasker taʿyîni mesârıfât-ı külliyyeye muhtâc olup, matlaba vusûl dahi mechûl olmağla, mahzûr-ı tarafeyn mülâhaza olunup, ihtiyâr-ı ehven-i şerrin kāʿidesi üzere ʿafvı semtine zehâb emr-i savâb olduğunu ehl-i şûrâ işrâb etmeleriyle ʿafvı karâr-gîr ve ibkāy-ı Vezâret'i kuvve-i mütehayyilede tasvîr olundu. Ancak müşârun ileyhin habâset-i tiynet ve redâʾet-i tabîʿatı iktizâsıyla ʿahde vefâ etmeyeceği meczûm olup, bir müddetden sonra vukūʿu muhakkak olan mesʾûlât-ı garaz-âlûdunu icrâya kıyâm ve taraf-gîri olan şekāvet-pîşeleri birer mansıb ile bekâm eylemek kaydına düşüp, binâʾen-ʿalâ-zâlik o makūlelere mansıb verilmeyüp, husamâsını hufyeten ikdâr ile üzerine teslît ve icrây-ı letâyifü'l-hiyel ile igfâl ü taglît eylemek vâdîleri iltizâmıyla mâddeye nizâm ve meclise hitâm verilüp, iki günden sonra müşârun ileyhin Vezâret'i ibkā ve İskenderiyye Sancağı tevcîhiyle kemâ-kân mesbût-ı mecelle-i vüzerâ kılındı. [Ü2 18b]