Mudanyalı Şeyh Mehmed Rûşenî Efendi -ki Hüdâyî Mahmûd Efendi Tekyesi'nde bast-ı kālîçe-i irşâd ve vaʿz ü nasîhat ile ilâne-i kulûb-ı ʿibâdı muʿtâd etmişidi- şehr-i mezkûrun on altıncı gicesi zulmet-gede-i ʿâlem-i fânîden ğazz-ı nigâh-ı iʿtibâr ve tekyede ihzâr eylediği mezâr-ı lâmiʿü'l-envârı mahall-i karâr edüp, münhall olan Hüdâyî Tekyesi, oğlu Şehâbeddîn Efendi'ye tevcîh ve sâ'ir cihât ile bâkī evlâdları terfîh olundu. Şeyh-ı merkūm Hüdâyî Tekyesi inhilâlinde Sultân Ahmed Câmiʿi'nde tarîk Şeyhı bulunup, terk-i tarîk ile tekye-i mezkûreye rağbet ve husûlüyle nâyil-i meserret ve Halîl Paşa Sadâreti'nde refʿ-i Meşîhat'le mübtelây-ı gurbet ve ʿArab-zâde ʿAtâʾullah Efendi Şeyhulislâm oldukda, meclis-i evvelde şeyh-ı mezkûru şefâʿat ile tahliye-i sebîline ve Hüdâyî [Ü2 17b] Meşîhati'nin tekrâr tevcîhine ʿillet olup, yirmi beş sene kadar tekyede Celvetiyye âyînini icrâ ve siniyy-i ʿömrü mütenâhiz-i ʿakd-i semânîn olduğu hâlde terk-i dâr-ı fenâ [Ü1 17a] eyledi. Şeyh-ı mûmâ ileyh ʿulûm-ı âliyye vü âliyyeyi pederinden ve muʿâsırı olan fuhûl-i ʿulemâdan tahsîl ve usûl-i tarîki Pertevî Efendi'den tekmîl edüp, Dürrî-zâde Mustafa Efendi Şeyhulislâm iken mûmâ ileyhi istishâb ve meclisinde vâkiʿ mübâhase-i ʿilmiyyeye müşâreket ile mütâlaʿa ve dikkatini istihsân ü istisvâb eyler idi.