İstanbul Kadısı olan Kethudâ-zâde Mehmed Sâdık Efendi tevfîk-ı Hakk'dan mahrûm ve vazʿ-ı esʿâr ve tenfîz-i kıyem ü mikdârda fiyâlet-i re'y ve rehâveti maʿlûm olduğuna binâ'en, müddetini itmâm etmezden mukaddem ʿazli iktizâ ve sâbıkā Medîne-i münevvere Kadısı İshak Efendi-zâde ʿAtâʾullah Efendi bir zemân Hubûbât Nâzırı olmak hasebiyle ahvâl-ı esʿâra âşinâ ve zâtında sâhib-i re'y ü nühâ bir zât-ı sütûde-ârâ olmağla, işbu Cumâdelâhıre'nin on yedinci günü Kazāʾ-ı İstanbul'a bâyeste ve Karamanî Şerîf Efendi'nin kıdem-i tarîkı sâbit olduğundan, beş gün mukaddem târîh ile pâye verilüp, kayd-ı tekaddümden vâreste oldu. [Ü1 12a]