Mûmâ ileyh Nakkāş-başı Mustafa Ağa'nın ferzend-i dil-bendi olup, fark-ı sevâd ü beyâz ve temyîz-i cevâhir ü aʿrâz eylediği hînde, Dîvân Kalemi'ne me'mûr ve çok geçmeden fenn-i kaleme ıttılâʿ ile meşhûr olup, seksan iki senesi sefer-i hümâyûna ʿâzim ve tahrîr-i mühimmeye müdâvim olup, giderek Dîvân-ı hümâyûn'a Kîsedâr ve akrânı miyânında sibâk-ı gāyât-ı iftihâr olmuşidi. Ordu-yi hümâyûn Şumnu'da iken ʿAbdülkerîm Efendi mütârekeye [Ü1 11b] me'mûr oldukda, Sâhib-i terceme dahi mütâreke kitâbeti ile taʿyîn ve mütâreke inʿikādı haberi vürûdunda hidmetleri tahsîn olunup, ʿAbdülkerîm Efendi'ye Baş-muhâsebe Pâyesi ve mûmâ ileyhe [Ü2 12a] Hâcelik ru'ûsu ihsân ve ʿavdetlerinde Topçular Kitâbeti ile şâdân kılınup, Ordu-yi hümâyûn Âsitâne'ye vürûdunda, hidmetinde mukîm ve Halîl Paşa Sadâreti'nde Küçük Tezkirecilik ile mazhar-ı lutf-ı ʿamîm olmuşidi. Bu defʿa vukūʿ bulan seferde Mektûbî-yi Sadr-ı ʿâlî ve Nemçe ve Moskov mükâlemelerinde Büyük Rûznâmecilik ile Murahhas-ı Sâlis olup, Âsitâne'ye meşkûru'l-hıdme ʿavdetlerinde Defter Emâneti ve Büyük Rûznâme ve Cizye Muhâsebeciliği ile imrâr-ı eyyâm ve Râşid Efendi'nin ʿazli hengâmında Reʾîsülküttâb-ı vâlâ-makām olmuşidi. Dört mâh kadar hıdmet-i Riyâset'le muʿammer ve mâh-ı merkūmun on üçüncü gicesi siniyy-i ʿömrü ʿakd-i sittîne mütenâhiz olduğu hînde sûy-ı âhırete sefer eyledi. Müşârun ileyh sâdıku'l-lehce, sâfî-nihâd, dervîş-meşreb, sahîhu'l-iʿtikād, Devlet-i ʿaliyye'nin sadâkat-kârı ve ricâl-i devletin vefâdâr ve hukūk-şiʿârı idi.