Sadrıaʿzam Kethudâsı el-Hâc Ebûbekir Ağa cild-i evvelde [Ü1 10b] tafsîl olunduğu vech üzere bekāyâ tahsîline me'mûr olup, tarafından nükûl zuhûruna mebnî Kethudây-ı vakt bulunan Hakkı Mehmed Beyefendi tarafından tehdîd-i şedîde mazhar ve bir mahalle iclâsı muzmer olmuşidi. Mûmâ ileyhin sûretini kesr ve merkūmun hâtırını cebr dâʿiyesiyle baʿzı tarafdan cânib-dârlık resmi icrâ olunup, reh-yâb-ı kayd-ı iclâ ve ʿafv-ı me'mûriyyet sûreti rûnümâ olmuşidi. Mebde'-i mâdde mîr-i mûmâ ileyhin [Ü2 11a] maʿlûmu olmakdan nâşî, hem-râzları yanında ʿalenen sebb ü nefrîne âgāz ve usûl-i muhâlif ile vâdî-yi râst-gûyîde nağmesâz olduğundan, hasmı mütebassırâne hareket “Ve teğedda bi'l-ʿadüvvi kable en yeteʿaşşâ bike” mefhûmuna riʿâyetle hiddet-i tabʿ ve ahz-ı bertîl-i nakīsalarını mûmâ ileyhe tahmîl ile mesnedinden tenzîl ve Kethudâlık, Bekir Ağa'ya tahvîl ve bu hâlet-i garîbe vukūʿu, [mısra]: Dâd-ı Hakk-râ kābiliyyet şart nîst me'âlini iʿlâm ve vücûd-i istihkāk u liyâkat iddiʿâsında olanların ünûf-i şâmihaların irgām edüp, Ağa-yı mûmâ ileyh dahi şebah u heyûlî gibi hayyizinde kıyâmı mevhûm ve dâd ü sited ve nüfûz-ı galebe-i yed taraf-ı âharda lâzım u melzûm olup, “ed-Dünyâ kabbân ve nahnu maʿa'r-rüchân” terâneleriyle bir zemân dest-zen-i şevk ü tarb ve bu esnâda ʿazl ile kânûn-ı derûnu pür-leheb olup, Sadrıaʿzam Kethudâlığı hâlâ Rûznâmçe-i Evvel olan Birrî ʿAbdullah Efendi'ye ve Rûznamce-i Evvel, Baş-muhâsebeci bulunan Şerîf Mehmed Efendi'ye ve Baş-muhâsebe, Mektûbî-yi Sadrıaʿzamî ʿAzmî Ahmed Efendi'ye ve Mektubçuluk, dirâyet ü kemâli zâhir olup, bir zemândan berü Baş-halîfelik ile Mektûbçu Kalemi'ni müdîr olan Besîm İbrâhîm Efendi'ye ve Baş-halîfelik, Seyyid Gālib Efendi'ye ve Târîhcilik, İkinci Halîfelik ile, nazm: İnne'l-hilâle izâ ra‘eyte nümüvvehû Eykante en se-yekûnü bedren kâmilâ beyti, hakkında müstenbit-ı ehl-i tedkīk olan Refîk Mustafa Efendi'ye tevcîh olundu.