Sadrıaʿzam olan Melek Mehmed Paşa tekaddüm-i zâtı ve zemânı ile beyne'l-vüzerâ ser-efrâz ve tasarrufât-ı ʿakliyye ve tedbîrât-ı mülkiyyede meleke vü liyâkati müsellem-i ashâb-ı imtiyâz ise dahi, [nazm]: Muʿammerun kāle Nûhun hîne ebsarahû İnnâ muhayyûke f'eslem eyyühe't-talel mefhûmuna mâ-sadak ve nazm-ı meşhûr: İnne's-semânîne ve bulliğtehâ Kad ahvecet semʿî ilâ tercümân mübelligine mülhak olup, zaʿf-ı pîrî ve inhitât-ı sinn ile erkân-ı vücûduna vehn ü halel târî ve idâre-i umûr-ı devletde fütûr u keseli emr-i zarûrî olduğundan, hifzan li'n-nizâm ʿazli karârgîr-i Şehriyâr-ı enâm olmuşidi. Anadolu Vâlîsi Vezîr ʿİzzet Mehmed Paşa'da rüşd ü reviyyet ve Vekâlet-i mutlaka'ya istîhâl ü liyâkat melhûz olup, İzmir'den hareket ve mansıbına ʿazîmet ile Gedüs Kasabası'na nüzûl hılâlinde müjde-i mühr-i hümâyûn, Hasekî vâsıtasıyla tarafına vusûl bulup, der-ân-sâʿat mütenekkirâne hey'et ile müteveccih-i Âsitâne-i saʿâdet olmuşidi. Melek Mehmed Paşa ise etvâr-ı ʿâleme nazar ile makāmında tezelzül-i âsârını müşâhede edüp, ʿİzzet Paşa'dan müsteşʿir ve Anadolu Eyâleti'ne takrîbinden müstenfir olup, dağlı eşkıyâsı üzerine me'mûriyyetini tabîʿat-ı vakt muktezayâtına haml ile kuvvetden fiʿle îsâl ve Gelibolu Ma'beri'nden güzâr etmek üzere istihsâl-ı ruhsat ve tarafına irsâl-i misâl [Ü1 8a] ve zu'munca defʿ-i rakīb ve ibʿâd-ı karîb edüp, gulüvv-i hırs-ı mekāsıd ü âmâl “el-ʿAbdü yüdebbiru ve'l-kazâ yadhakü” meʾâlinden müşârun ileyhi igfâl etmişidi. ʿİzzet Mehmed Paşa tayy-i merâhil ve katʿ-i menâzil eylerek şehr-i Rebîʿulevvel'in yirmi beşinci İsneyn günü Üsküdar'a vusûl bulup, yevm-i mezkûrda Melek Paşa erkân-ı devlet ile Barut-hâneler'e nezâret etmek ve Nâzırı Şerîf Mehmed Efendi'nin tertîb eylediği ziyafetine [Ü2 8b] gitmek kasdında olduğu bir gün evvel bi'l-istîzân maʿlûm olup, Barut-hâne'de intizâʿ-i mühr-i hümâyûn içün Mîrâhûr-ı Evvel Ağa isrâʿ olundukdan sonra, Melek Paşa zevrak-nişîn-i sürûr ve “Felekden bir gün uğurladık” terâneleriyle dem-sâz-ı hubûr olarak Top-kapu sâhiline karîb mahalden murûr eder iken, Barut-hâne Bâzârlığı bozulup, fi'l-hâl “Ecibil-emîr” nidâsı Melek Paşa'nın merâretde zâʾika-i iştihâsı olup, Balık-hâne'ye vazʿ-ı lenger ve muntazır-ı emr-i Pâdişâh-ı bahr ü berr olduğu hâlde Küçük Mîrâhûr vâsıtasıyla mühr-i hümâyûn istirdâd ve ʿİzzet Paşa dahi ol hilâlde Serây-ı hümâyûn'a gelmiş bulunmağla, hasret-keş-i vüzerâ-yı ʿizâm olan mühr-i hümâyûn yeden-be-yed dest-i sadâkat-peyvestine teslîm ile mirkāt-ı Vekâlet-i mutlaka'ya isʿâd ve Bâb-ı ʿâlî'ye gelüp, ʿumûm hilʿatler ile erkân-ı devleti taltîf ü isʿâd eyledi. Sadr-ı sâbıkın eyyâm-ı pîrî ve nâ-tüvânîde kayd-ı iclâya mübtelâ olması revâ-dâşte-i tabʿ-ı Pâdişâhî olmayup, sâhil-hânesinde ikāmet ile duʿây-ı bekāy-ı ʿömr-i devlet-i hazret-i Şehriyârî'ye muvâzebet eylemesi irâde ve bu haber-i hayr fi'l-hâl müşârun ileyhe ifâde olundukda, izhâr-ı ibtihâc ü beşâşet ve sâhil-hânesinde ârâm u ikāmet eyledi.