Âsiye-ʿiffet, Belkīs-devlet, Betûl-ʿismet, Zehrâ-taviyyet Vâlide Sultân ebkāhallâhu ilâ âhırı'z-zemân hazretlerinin fi'l-asl isticlâb-ı birr ü hayrât ve iktisâb-ı mesûbât ü hasenât, matlab-ı aʿlâ, maksad-ı esnâları olduğuna binâ'en, bu defʿa Hasköy'de müceddeden binâ olunan Lağımcıyân Kışlağı'nda evkāt-ı hamse edâ olunması irâdesiyle metîn-i verâsı bir câmiʿ-i dil-ârâ binâsı pîrâmen-güzâr-ı hâtır-ı ilhâm-meʼâsirleri olup, dest-yârî-yi mühre-i sunnâʿ ile câmiʿ-i mezkûr bu esnâda ahsen-i nesak u nizâm üzere hayyiz-resân-ı hıtâm olup, [Ü1 7a] vezâyif ü cihâtı tanzîm ve levâzım-ı sâʼiresi tetmîm olunup, evkāf-ı şerîfelerine ilhâk ve hadîs-i “Men benâ mesciden” beşâretine kesb-i istihkāk ile ilâ-yevmi't-telâk, ism-i şerîflerin mezkûr sükkân-ı ârazîn ü âfâk eylediler. Emr-i binâ müteferriʿâtıyla ikmâl olunduğu haberi vâsıl-ı semʿ-i Şehriyâr-ı Sürûşî-hısâl olduğuna binâ'en, işbu şehr-i Rebîʿulevvel'in ikinci Cumʿa günü edây-ı salât-ı Cumʿa zımnında bi's-saʿâdeti ve'l-ikbâl, zevrak-süvâr-ı iclâl ve pîşgâh-ı iskelede muntazır-ı nîm-nigâh-ı iltifât olan bendegânı tahrîk-i âb-rûy-i nevâziş ile mazhar-ı lutf u nevâl buyurup, Cumʿa nemâzını edâ ve hademesini [Ü2 7b] zülâl-ı ʿatâyâ ile irvâ buyurdukları hâlde, Lağımcıyân Kışlağı'nın Binâ Emîni olup, bundan akdem Bozcaada'ya tagrîb olunan Seyyid Mehmed Efendi'nin ıtlâkı husūsu devletlü Vâlide Sultân-ı ʿaliyyetü'ş-şân hazretleri tarafından recâ ve fi'l-hâl recâlarına müsâʿade-i seniyye rû-nümâ olup, tahliye-i sebîli zımnında irsâl-i misâl ve bu ıtlâk o târîhde iclâ olunanlara berâʿatü'l-istihlâl olup, ikinci Cumʿa'da Sadrıaʿzam hazretleri dahi câmiʿ-i mezkûrda edây-ı salât ve mürtezikasını nâ'il-i sılât buyurdular.