Tabîʿat-i vakte nazaran teksîr-i sefâyin-i Devlet-i ʿaliyye'ye ehemm ve yalnız Tersâne-i ʿâmire teksîre medâr olmayacağı gayr-i mübhem olmağla, sevâhil-i Bahr-i sefîd ve siyâh'da iʿmâl-i sefâyine sâlih baʿzı mahaller keşf ü muʿâyene olunup, sühûlet mülâhaza olunan [Ü1 5a] mahallerde vazʿ-ı esâs-ı merâkib kılınmak mukaddemâ bi'l-müzâkere karâr-gîr-i erbâb-ı re'y ü tedbîr olmuşidi. Binâ-berîn işbu Saferü'l-hayr evâ'ilinde Kapudan Paşa hazretleri baʿzı ricâl-i Tersâne ile Bahr-i sefîd Boğazı'na varup, zebân-güzâr-ı ehl-i vukūf olan Edremid sâhasını müşâhede ve ancak fırkateyn iʿmâline salâhiyyeti olduğunu tahkīkden sonra, Kalʿa-i Sultâniyye'ye pâ-nihâde olup, mahall-i mezkûrun kebîr sefîne inşâsına tehammülü nümâyân ve etrâfdan ber-vech-i sühûlet eczây-ı sefîne tedârükü dâhil-i hayyiz-i imkân olmağla, erbâb-ı iktidârdan İznikli müteveffâ Vezîr ʿAlî Paşa'nın birâderi ʿOsmân Bey'in bu hıdmete liyâkati inhâ ve bir kebîr sefîne inşâsını ʿuhde-i sadâkatine havâle edüp, mühimmât-ı lâzimesini kavlen ve fiʿlen müheyyâ kıldıkdan sonra, bu tarafa ʿavdet ve mahsûl-i ʿazîmetini takrîren ve tahrîren ifâdeye mübâderet eyledi.