[Ü2 4b] Mûmâ ileyhin birkaç seneden berü kevkeb-i tâb-dâr-ı ikbâli müstaʿlî ve asâlet ü vekâlet ile mesned-i Riyâset'e müstevlî olup, cins-i nakd ile kîse-i iddihârı memlû ve cevâhir ve tuhaf-ı girân-behâ ile sandûkçe-i iktidarı tâb-gülü olduğundan gayri, sâlik-i râh-ı hatar u tuğyân ve kesret-i havâşî vü gılmân ile kesb-i teʿazzüz-i nefs ve tekmîl-i esbâb-ı servet ü sâmân edüp, inhisâr-ı mesned ile izhâr-ı gunc u delâl ve istifâ vü imtinân sûretinde iʿlân-ı endûh u melâl eylediği ve bâlâda mezkûr nefy mâddesinde eli ve o şîve-i nâgeh-zuhûr emrinde küllî medhali olup, nâsı tagrîb ü tekdîrden garazı, halkı tahvîf ile celb-i emvâl [Ü1 4b] ü eşyâ ve umûr-ı devlete kemâ-yehtâr u yeşâ, tasarruf u istîlâ olduğu, ʿaks-endâz-ı mir'ât-ı tabʿ-ı Hudâvend-i ʿadâlet-pîrâ olduğundan gayri, bu fezâhatden sonra mûmâ ileyhin imtinân ü istignâ sûretinde şîve-i nâ-hemvârı külliyyen mugāyir-i mizâc-ı Şehriyârî olmağla, fi'l-hâl ʿazl ve hânesinde ikāmet ile mübtelây-ı melâmet ü ʿazl olup, Riyâset-i Küttâb hidmetiyle umûr-ı Dîvâniyye'ye âşinâ ve sinîn-i çendîden berü hıdemât-ı devletde sadâkati hüveydâ olan Dürrî es-Seyyid Mehmed Efendi kâm-revâ oldu.