Kayseriyye arpalığı münhal oldukda, ‘ilmine hürmet ve ihtiyârlığına merhamet zımnında Dağıstânî Efendi'ye ‘arz u istirhâm olunup, makrûn-ı müsâʻade-i hazret-i Cihân-bânî olmuşidi. Zikrolunan arpalık emri müşârun ileyhe vusûl buldukda, ferdâsı teşekkür içün hâne-i Fetvâ-penâhî'ye varup: "Sadâret-i Anadolu bi-hasebi't-tarîk hakk-ı sarîhimiz olup, tasarrufuna beş mâh müddet kalmış iken, arpalık tebdîli ‘abes değil midir?" deyü temhîd-i mukaddime etmişidi. Müşârun ileyh sâl-hûrde vü ‘alîl ve seyr ü harekete ‘adem-i iktidârı vâreste-i delîl olup, Kadıʻaskerliğin âhara tahvîl ü tefvîzi lâzım geldi ise dahi tehallüf-i matlabdan gayr-i mahzûz ve inkisâr-ı zücâc mizâc ile dil-rîş ü magmûm olacağı melhûz olduğundan, pâye tevcîhi ile hurrem ve arpalık izâfesiyle mükerrem kılındı.