Birkaç gün mukaddem ‘atıyye-i hazret-i Şehinşâhî ile mübtehic ü mübâhî olan sabıkā Sadr-ı Anadolu Dâğıstânî İbrâhîm Efendi hakkında ‘inâyet-i şâmilü'l-etrâf-ı Cihân-dârî müterakkī vü mütezâyid ve işbu Muharremü'l-harâm gurresinde Pâye-i Rumeli'ye mütesâ‘id kılındığından gayri emsâline kıyâsen arpalık itâ ve kayd-ı zarûretden ihlâ olunundu. Bi'l-fiʻl Rumeli Kadıʻaskeri olanların pâyeleri yevm-i ‘azillerinden mu‘teber olduğundan, hâlâ Sadâret-i Rûm'a şeref-bahş olan Mehmed Sâlih Efendi-zâde [222b] Ahmed Esʻad Efendi'ye sekiz senesi Zilhicce'sinin yigirmi dokuzuncu gününden iʻtibâr ile Rumeli Pâyesi ihsân ve elem-i cân-hıraş-ı sebkat-i âhardan tahlîs ile mazhar-ı lutf-i ferâvân kılındı.