Donanma-yi hümâyûn'un ba‘zı mülâhazaya mebnî Beşiktaş pîşgâhında ikāmeti bundan akdem telmîh olunmuşidi. Mevsim-i derya-güzerân ve müşârun ileyh hazretlerinin bundan sonra Akdeniz'e ‘azîmetinde çendân fâyide olmadığı nümâyân olduğundan fazla, Bahr-ı sefîd'de korsân ve lüsûs-ı sâyirenin tecâvüzü mesmû‘ olmayup, ma‘amâfîh Akdeniz'in bi'l-külliyye sefâyin-i devletden huluvvü münâsib olmadığına binâ’en, mukaddemâ ba's ü tesyîr olunan sefâyinden mâ‘adâ, işbu bin iki yüz dokuz senesi [222a] Muharremi gurresinde dahi birkaç kıt‘a sefîne tesyîr ve süfün-i bâkiye ile müşârun ileyh hazretlerinin ‘azîmeti te'hîr olundu. Âsitâne'de tevkīf olunan sefâyinde mevcûd dilâverlerin bî-taleb ü ferâğ ile imrâr-ı vakt eylemeleri nâ-münâsib ü müstehcen ve evkāt-ı hâliyede olmakla fünûn-ı harbiyye-i bahriyyeyi tahsîl eylemeleri emr-i müstahsen olmağla, kavâ‘id-i harb-i bahra dâyir ihtirâ‘ olunan evzâ‘-ı cedîde ve işârât-ı müfîdenin gâh u bî-gâh icrâsıyla âzmâyiş ve işgāllerine ibtidâr ve böyle bir fâyide-i lâzımenin erbâbına irâ'e vü te‘allümü ile bu sâl-i hu[c]este-fâlde mesârif-i Devlet-i ebed-müddet beyhûde mahalle sarf olunmamış olduğu mevki‘-i cevabı erbâb-ı iʻtirâzda vâkīʻ olduğu zâhir ü âşikârdır.