Hâlâ Karaman Vâlîsi ve Çirmen Mutasarrıfı Vezîr ‘Ali Paşa def‘-i gavâyil-i eşkıyâya me'mûr olup, ‘asâkir-i etrâf ile sevâd-ı cemʻiyyeti teksîr ve mebâliğ-i mühimmât ile zâtü'l-vekūd gayreti tescîr olunmuşidi. Karârgâhı olan Niş'den hareket ve meʼmûr-ı maʻiyyeti olan ‘askere bakmayup, dâyiresi halkıyla Bâzârcık kurâsından Dere Karyesi'nde mütehassın eşkıyâ üzerine ilkā-yı havf u haşyet edüp, bir iki sâʻat mukaddem eşkıyâ haber-dâr ve enfüs-i habîselerini tahlîs içün bâdiye peymâ-yı firâr oldukları maʻlûm olduğu sâʻat taʻkîb ü muhârebeye mübâşeret olunup, baʻzısı şemşîr-i kahr ile münʻadim ve baʻzısı hayyen ahz olunup, dest ü pâları münkatıʻ u munsarim ve 'ibret-i her gaşûm u zâlim olmak içün kenâre-i rezm-gâha ilkā ve bakıyyetü's-suyûfa Çırpan Kazâsı'nda vâkiʻ Kuleli Karyesi'ni melce' ü me'vâ ittihâz eyledikleri inbâ olunup, tekrar üzerlerine hücûm u mukāvemete kudretleri maʻdûm olduğundan leylen firâr ve Dimetoka Kazâsı mülhakātından Sunurlar Karyesi'ne mütehassın oldukları istihbâr olunduğu halde ilgār ile üzerlerine sevk-i leşker-i cerrâr kılınup, kemâ-kân cenge ikdâm ve o esnâda dîger karyede kâyin hevâdârlarından bir gürûh-ı mekrûh kasd-ı iʻânet ile mütebeyyin olup, dâhil ü hâricden cenk-cûyân-1 cânibeyn gımâr-ı mehâlike [221a] iktihâm edüp, bilâhare zûr-bâzû-yı ‘asâkir-i devlete tâb-âver-i müdafaa olamadıklarından, pey-siper-i arz-ı fesîh-i inhizâm, Gümülcine karyelerinden Kirli Karyesi'nde tervîh-i nefs-i bed-fercâm eyledikleri Vezîr-i müşârun ileyhe i'lâm olundukda, bâzû-yi himmete fütûr vermeksizin ta'kîb ve karye-i mezkûrenin etrâfi seng ve medâhil ü mehârici halka-i mîmden teng olduğuna binâ’en, süvârîlerini müşârun ileyh piyâde edüp, esbâb-ı hasr u tazyîki tasvîb ve dört gün 'ale't-tevâlî bezm-i rezm-i tertîb edüp, eşkıyâ-yı mezbûrenin suver-i istidrâcları maʻkûs ve hayatlarından bi'l-külliye me'yûs oldukları mahsûs olup, bu hâl ile cümlesi birden muhacim ve ümmîd-i halâs ile yek-dîgere müzâhim olmalarıyla, bir mikdârı tuʻme-i tîg-i dimâr ve bir mikdârı fürce-yâb-ı semt-i idbâr olup, mahall-i maʻrekeye otuz sâʻat bu'du olan Gümülcine kurâsından Yesi Karyesi'nde ‘inân-keş-i haybet oldukları mesmû olmağla, fi'l-hâl müşârun ileyh ședd-i zeberteng-i isti‘câl ve karye-i mezkûreye taslît-i ebtâl-i ricâl edüp, derûn-ı karyede ahcârdan masnû baʻzı ebniye olmak takrîbi ile istikrâr-ı eşkıyâya medâr ve bu hâl ile yedi gün tarh-ı kurʻa-i kâr-zâr ve kemâl-i 'acz ü hüsrân ile bu karyeden dahi girîzân ve vâfiri küşte-i seyf ü sinân olduklarından gayri, ecel-i resîdeleri siyâset-i kat‘-1 aʻzâ ile 'ibret-i sâyir ve sebeb-i tevehhüm-i her zâlim ü fâcir kılındı. Bundan başka altı yüz mikdârı erbâb-ı bagy u fesâd yek-dîgere iʻtizâd ile Hâsköy Cibâli'nde vâki Yoğurdcu Karyesi'nde binâ etdikleri kullelerde tehassun u istinâd etdikleri müşârun ileyhin mesmûʻu olup, ‘ale'l-gafle üzerlerine îlgār u yürüyüş ve sâyir vech ile zafer-i düşvâr olduğundan, ‘alâ-tarîkı'l-muhasara mukātele vü müşâcereye karar verilmişidi. Sekiz gün [221b] mâ-beyne'l-ferîkayn kıtâl vâkiʻ olup, encâm-ı kâr mahsûr olan eşkıyâ râkib oldukları hayvânâtın eznâblarını kat ve mecrûhların ihrâk ve leylen kullelerin bi'l-cümle hurûc u muhârebe eyleyerek cûya-yı câ-yı selâmet oldukları tehakkuk etmekle müşârun ileyh tarafından mukābele ve birkaç sâʻat mutârade vü mukātele olunup, bu defa dahi vâfir şakī rehrev-i semt-i ‘adem ve bakiyyetü's-suyûfu Nevrekob Kazâsı'nda vâki bir karyeye vaz‘-ı kadem ile üftâde-i girdâb-ı nedm oldular. Müşârun ileyh yine verâlarını kollayarak kazâ-yı nâgehânî gibi mütehassın oldukları mahalle vürûd eylediği meşhûdları oldukda, mahall-i mezkûrda dahi müstekarr olmayup, Despot Yaylası'na su‘ûd ve öyle bir sa‘bü’s-sülûka tevakkul ile muhâfaza-i vücûd-ı nâsûd eyledikleri ve Despot Yaylası her ne kadar mevâzi‘-i hasîneden ise dahi kat‘-ı ‘arak-ı eşkıyâ matlûb olduğundan menâ‘atına bakılmayup, bi'l-ğuduvvi ve'l-âsâl bi'l-külliye tedmîr ü istîsâlleri esbâbıyla iştigāl üzere olduğunu Vezîr-i müşârun ileyh tahrîr eylediğinden fazla, me'mûr olduğu hidmeti hulûs-ı taviyyet ve safvet-i niyyet ile pezîrufte-i temşiyet ve vûkūʻ bulan muhârebâtda hayli zahmet çekdiği sübût-yâfte-ı sıhhat-i rivâyettir.