Meşâhîr-i meşâyih-i Nakşibendiyye'den Dülger-zâde Şeyh Mehmed Sıddîk Efendi birkaç günden berü münharifü'l-mizâc ve ‘illeti nâ-kâbil-i müdâvât ü ‘ilâc olup, işbu Zilka‘de'nin beşinci günü terk-i ‘alâyık ve pederi Rızâ Efendi'ye câr-ı mülâsık oldu. Mûmâ ileyh sâhib-i fehm ü hoş-sohbet ve lisân-ı ‘asra âşinâ bir merd-i bî-külfet olup, kanâʻat-kerde-i rızk-ı maksûm ve dânende-i me'âlü'l-harîs-i mahrûm olduğundan başka, dâyiresine müdâvemetde meymenet ve şathiyyât makūlesinden olan kelimâtı ekser evkātda muvâfık-ı zamîr-i ehl-i hâcet olup, istihrâc-ı ʻibâreye kādir ve fenn-i târîhe vukūfu zâhir idi.