Bir müddetden berü Rumeli'nin yemîn ü yesârında ‘alem-efrâz-ı bagy u tuğyân olan dağlı eşkıyâsını tedmîr ve levs-i vücûdlarından o havâlîyi tathîr etmek dâʻiyesiyle, Edirne Bostâncı-başısı Serbest-zâde Mehmed Ağa'ya ısdâr-ı emr-i kazâ te'sîr olunmuşidi. Merkūm bu meʼmûriyyeti medâr-ı celb-i mâl ve mukaddime-i nizâm-ı hâl edüp, Edirne etrâfında mütemekkin ehâlîyi tecrîm ü ızrâr ve Edirne kutrundan hâric kazalarda vâki fukarâyı cerîh-i nîş-i cevr ü âzâr eylediğinden başka, eşkıyâya re'y verilmek vesîlesyile sergerdelerinden vâfir mâl istihsâl ve agrâz-ı sâyiresine revâc vermek içün o makūle ehl-i fesâdı tahrîk ü taslît ile me'mûriyyet-i asliyyesini ber-hemzede-i ihtilâl etmekle, sâyire ‘ibret ve havene-i nâsa sebeb-i ruʻb u haşyet olmak zımnında merkûmun teʼdîb ü tenkîli lâzım gelmişidi. Binâ'en-‘alâ-zâlik işbu Şevvâl'in sekizinci günü Edirne Bostâncı-başılığı'ndan ‘azl ve Kapucu-başılığı ref ve emlâk u erâzîsinden mâʻadâ bi'l-cümle emvâl ü eşyâ vü zimemi cânib-i mîrîden zabt ve Mağusa Kalʻası'na nefy ü def olunup, Ferecikli Ahmed Ağa dilîr ü kâr-âzmâ ve bu me'mûriyyetin ‘uhdesinden geleceği meʼmûl-ı erbâb-ı nühâ olduğuna binâ’en, menfâ-yı mezbûra câ-nişîn ve ber-minvâl-i muharrer dağlı eşkıyâsı üzerine taʻyîn olundu.