Bundan akdem Rûsiyyelü tarafından mu‘tâd üzere Büyük-elçi vürûd eylediği bâlâda zikr olunmuşidi. Hediyye vü nâmesini teslîm ‘akabinde erkân-ı Devlet taraflarından da‘vet ve hedâyâ ile riʻâyet ve bu esnâda inkızâ-yı müddet-i muʻayyene ikāmet ile memleketi tarafına ‘avdet eyleyeceğini ba-takrîr ‘arz-ı huzûr-ı Sadr-ı vâlâ-menkibet etmekle, lede'l-istîzân şehr-i merkūmun dokuzuncu Salı günü tertîb-i Divân olunup, Sefîr-i merkūm ‘atebe-i Bâb-ı gerdûn-kıbaba vaz‘-ı cebîn-i istizlâl ve hediye nâmıyla getürdüğü semmûrlardan aʻlâ bir ferve-i girân-behâ ilbâs olunup, nâmesinin cevâbını ahz u istihsâl ve memleketi tarafına sevk-i matıyye-i isti‘câl eyledi. Esnâ-yı râhda Elçi-yi mersûmun muhafazasıyçün Mîr-i mîrân'dan biri taʻyîn olunmak de'b-i dîrîn olup, hâricden birinin taʻyîn olunmasında tekellüf derkâr olduğundan, itmâm-ı hıdmet ‘akabinde ref‘ olunmak şartıyla Dergâh-ı âlî kapucu-başılarından Mehmed ‘Ali Ağa pâye-i mezkûr ile tekrîm ve gedüklü ağalardan biri mihmândâr ta‘yîn olunup, kifayet mikdârı yedine meblağ teslîm olundu.