Nûr-ı şems ile kamer beynine arz tavassut ve kamer-i fî-zıllu'l-arz vaki‘ olup, bekā-yı zıll-ı aslî ile Kamer münhasif görülür. "İnne'ş-şemse ve'l-kamera lâ-yenkesifâni li-mevti ahadin ve-lâ li-hayâtihî velâkinnehâ âyetâni min-âyâtillâhi yuhavvifullâhü bi-himâ ‘ibâdihü" hadîs-i şerîfi ehl-i heyetin takrîrini münâfî değildir. Zîrâ Hakk sübhânehû ve Te‘alâ'nın ef‘âl-i İlâhîyyesi ba‘zan ‘ala-hasebi'l-‘âde ve ba'zan lâ alâ hasebi'l-‘âde vukū‘ bulan kudreti sebeb ü müsebbib üzerine hakimdir. ‘Ulemâ-yı mütebassırîn ‘alâ-harku'l-‘âde ‘umûm-ı kudret-i Samedâniyye'ye mu‘tekid olup, bir şey’-i garîb vukū‘ buldukda, zâlike'l-i‘tikād sebebi ile havf ederler. Bu sûretde bu ‘âdetin cereyânı içün ba‘zı esbâb zuhûrunu men‘ ü inkâr etmezler.