Bundan akdem Anadolu Kadı‘askeri olan İbrâhîm Efendi Cumâdelûlânın yigirmi sekizinci günü hulûl-i ecel-i mev‘ûd ile vefât ve ‘âzim-i ‘âlem-i mükâfât oldu. Mûmâ ileyh bin yüz on üç senesi evâhırında Bartın Kasabası'nda tevellüd edüp, dâhil-i hayyiz-i temyîz oldukda Âsitâne-i saʻâdet'e vâsıl ve Şeyhuislâm dâyiresinde mevcûd olan Mûsevvidler katârına dâhil olup, elli yedi târîhinde müderris ve seksân beşde Yenişehir Mevleviyyeti ile müteneffis olup, doksan üçde Burusa ile bekâm ve doksan beşde Mekke pâyesiyle makzıyyü'l-merâm ve ikiyüz ikide İstanbul pâyesine tavsîl ve iki yüz dörtde Anadolu rütbesiyle tebcîl olunup, iki yüz altıda bi'l-fi'l Sadâret-i Anadolu'ya nâyil ve iki yüz sekiz senesinde ber vech-i muharrer dâr-ı âhirete müntakil oldu. Mûmâ ileyh bir müddet Fetvâ Emîni bulunmak takrîbi ile fenn-i Fıkh-ı şerîf'e bi-kemâlihâ muttaliʻ ve ‘ulûm-ı sâyirede dahi nevr-i zükâ’-i zekâsı mültemiʻ olup, i‘dâd-ı sinîyyi ‘ömrü doksan beş ‘akdine müntehiz bir pîr-i rûşen-zamîr idi.