Nemçelü yedinden nezʻ ü istihlâs olunan Hotin ve muzâfâtının îrâd u masrafı taʻdîl ve sâl-i güzeştenin mukātaʻâtı ‘alâ-tarîkı'l-emâne zabt ve emvâl-i cizyesi tahsîl olunmak zımnında hâcegân-ı Divân-ı hümâyûn'dan Mehmed Efendi o taraflara tesbîl olunmuşidi. Mûmâ ileyh ‘an-asl sâdık u müstakīm bir şahs olup, muktezâ-yı istikāmeti üzere îfâ-yı meʼmûriyyet ve mütehammil-i zamm olan mukātaʻâtı merkez-i i‘tidâle îsâl ile Devlet-i 'aliyye'ye hıdmet edüp, ancak bu esnâda baʻzı ‘ilel ile hasta ve emrâz-ı gûnâ-gûn ile dem-beste olduğu tahkīk olunup, bu hâl ile bekāsı mîrî maslahatına muzırr ve Mart dahi mütekārib olduğundan, âharının lüzûm-ı taʻyîni ezhân-ı erkânda müstekarr olmağla, müteveffâ İbrâ’îl Nâzırı'nın birâderi ‘Osmân Ağa'ya işbu Receb gurresinde Kapucu-başılık pâyesi iʻtâsıyla kadri iʻlâ olundukdan sonra, Hotin Defterdârı nasb ve selefi Âsitâne'ye celb olundu.