Aʻzam-ı edevât-ı sefâyin olan eşcârın Gemlik halîcine kurbiyyeti ve min-ciheti'n-nakl me'mûrlara küllî suhûleti olmakdan nâşî, ba'zan mahall-i mezkûrda sefîne inşâsına mübâderet olunur idi. Ancak sefîneye meʼmûr ‘amelenin sayf vaktinde harâret-i şemsden ve şitâ hengâmında şiddet bürûdetden tevakkī edecek mevzi‘-i mahsûsları olmadığından âfât-ı sayf u şitâya tâb-âver olamayup, bi'z-zarûre firâr ve bu sebeble mahall-i maslahatda ‘amelenin kılleti derkâr ve zabt u idareleri düşvâr olup, itmâmı irâde olunan sefîne metrûk u mühmel ve bidâyetinde vazʻ olunan ahşâb u âlât nihâyeti teʻayyün edinceye dek sâkıt ‘ani'l-‘amel olduğu dahi mücerreb-i erbâb-ı ‘akd u hall olduğundan fazla, bazı mühimmât Âsitâne'den nakle muhtâc olup, nakl ise terâhî-yi müddeti müstelzem olmağla, bu keyfiyyetin çâresi bulunmak bir müddetden berü zamîr-i münîr-i hazret-i Şehinşâhî'de cilve-ger olmuşidi. Binâ’en-‘alâ-zâlik mühimmât vazʻ u hıfz olunması içün bir mahall-i mahsûs binâ olunmak ve âfet-i germ ü serdden 'ameleyi vikāye içün Tersâne'de mebnî gözler misillü birkaç göz ihtirâʻ olunmak ve sefîne inşasına me'mûr olanlara dahi taraf-ı Mîrî'den dâhiliyye vü hâriciyyeli bir konak yapılmak matlûb-ı Şâhâne olup, iktizâ eden mesârifâtı mîrî tarafından edâ olunmak şartıyla Dergâh-ı ‘âlî kapucu-başılarından ve akviyâ-yı nâsdan sâbıkā Canik Muhassılı olan ‘Osmân Ağa şehr-i mezkûr gāyetinde Binâ Emîni nasb u taʻyîn olundu.