Hâl-i cemâl-i ‘Arabistân olan Halebü'ş-şehbâ'da birkaç seneden berü [191b] u fiten hüdüsüyle 'ibâd-ı zaʻîfü'l-iyâd mübtelâ-yı mihen ü meşâk ve Yeniçerilik iddi'âsında olan erbâb-ı şikāk sâyir sınıfa galebe ile aʻmâl-i ihtikâr i‘mâline ședd-i nitâk ve hevâlarına olan muhâlif olan vülâtı memleketden ihrâc hususunda ittihâz u ittifak etmişleridi. Müteneffisân-ı memleket ilcâ-yı zarûret ile o makūle şekā-pîşegân-ı beldeye râm ve irâde-i fâsidelerini tenfîz ile menâfi‘-i Haleb'i miyânelerinde iktisâm ve bu sebeble nüfûz-ı Vâlî zâyil ve icrâ-yı ahkâm-ı şerʻiyye gayr-i kābil olup, fukarâ tâlân ve reʻâyâ perîşân ve hükkâm za‘îf ü nâ-tüvân ve erâzil ü esâfil ise servet ü disâr ile kâmrân olmuşlaridi. Gavâyil-i seferiyye ile tedbîr-i tathîr-i memleket te’hîr ü tesvîf ve vakt-i vüsʻate taʻlîk ü tevkīf olunup, füshat-ı zemân nümâyân olduğuna binâʻen, Feyzî Süleymân Paşa beyne'l-vüzerâ intikā ve Vâlî-yi Halebü'ş-şehbâ olup, memleketin nizâmı ve ahsen-i vechile erbâb-ı şikākın inʻidâmı irâde ve müteʻaddid evâmir ile tarafına ifade olunup, Haleb'e duhûlünden sonra emr-i nizâma teşebbüs ve fîmâ-ba'd hılâf-ı rızâ hareket tehaddüs eylediği hâlde nezr-i girân edâsına ehâlîyi müteahhid ve sûret-i nizâm-ı memleket derbâr-ı devlet-medâra vârid olup, [192a] Baş-muhasebe'ye kayd ve mazâ-mâ-mazâ hükmüyle igmâz-ı mu’âheze-i Amr u Zeyd olmuşidi. Birkaç günden sonra müstehakk-ı gazab-ı Rabb olan eşkıyâ-yı Haleb fesh-i teʻahhüd ile merdüm-zâdegân-ı beldeden Gavrî-zâde Mehmed Efendi üzerine bila-sebeb hücûm ve darabât u şütûm ile vücûdunu mânend-i mum eylediklerinden gayri, hâricden vürûd eden erzâka kemâ-kân medd-i yed ve hod-be-hod dâd u sited eyledikleri Vâlî-yi müşârun ileyhe maʻlûm ve te’dîb ü icrâ-yı lâzıme-i siyasetde ‘aczi meczûm olduğundan, tebdîl-i hevâ sûretinde şehrin bâğçelerine hurûc ve eşkıyânın tekrar zirve-i tuğyâna ‘urûclarını Devlet-i ‘aliyye'ye ifhâm ve nezrin tahsîli ve eşkıyânın tenkîli bâbında emr-i kat‘iyyü'l-müfâd ve Ocak'dan müte‘ayyin mübâşir ile kapucu-başılardan mişvârı maʻlûm bir şahs-ı tavîlü'n-necâd taleb edüp, mülâyemet ü suhûlet-i tabîʻat ile maʻrûf olan kapucu-başılardan Uzun ‘Abdullah Paşa-zâde Sâdık Bey ve Ocak turnacılarından biri nizâm-ı memleket kasdıyla Haleb'e meʼmûr kılındı. Kapucu-başı ve Turnacı-başı muktezâ-yı me'mûriyetleri üzere Haleb'e 'azîmet ve oldukça memleketin nizâmına dikkat ve Haleb Vâlîsi'ni şehre da‘vet ile ehâlî ve Vâlî miyânında ilkā-yı ülfet eyledikleri haberi kar‘-ı sâmi‘a-i devlet eyledi.