Mûmâ ileyhin meʼmûriyyet-i asliyyesi menâfi‘-i sâyireden fazla bir menfaʻat-i müstakılleye mebnî iken, fevt-i fursat vukūʻ bulmuş ise dahi yine 'acâleten ‘azîmeti irâde buyurulmağla, [191a] mûmâ ileyhe on beş bin gurûş ve maʻiyyetine taʻyîn olununan Sır Kâtibi Mahmûd Efendi'ye dört bin gurûş ve merdüm-zâde olarak müstashibi olan Dervîş Ağa'ya iki bin gurûş ve Baş Tercemân'a üç bin gurûş ve İkinci Tercemân'a iki bin beş yüz gurûş ve bir nefer-i ehl-i zimmet merdüm-zâdesine bin beş yüz gurûş harc-ı râh verildiğinden başka sefîr-i mûmâ ileyhe beher sâl elli bin gurûş ve Sır Kâtibi'ne on bin gurûş ve merkūm Dervîş Ağa'ya üç bin ve Baş Tercemân'a sekiz bin ve İkinci Tercemân'a altı bin gurûş ve ehl-i zimmetden olan şahsa iki bin beş yüz gurûş meʻâş taʻyîn olunup, birkaç nefer ile kendüsi berren ‘azîmet ve Baş Muhasebe'de müfredâtı mukayyed olan hedâyâ-yı hümâyûn içün dahi bir kıtʻa sefîne istîcâr ve işbu Rebîʻulevvel evâhırında İngiltere tarafına tisyâr olundu.