Tersâne-i ʻÂmire'de Liman Re'îsi olan Seyyid Mehmed Kapudân'ın Karadeniz seferinde zuhûra gelan cübn ü rehâveti izâle-i vücûdunu müstelzim iken, Tersâne'de lâzım olur mülâhazası ve teʼdîb ile tezkiye-i nefs eder ihtimâli bekā-yı nefsine ‘illet ve ancak nefy ile bir müddet zahmet-keş-i derd-i gurbet olmuşidi. Çok geçmeden mûmâ ileyh dü-şâh-ı nefyden ıtlâk ile mazhar-ı nevâziş ü işfâk olduğundan fazla, Tersâne'de baʻzı hıdemât-ı mu‘teberede istihdâm ve giderek Liman Re’îsliği ile be-kâm kılınup, şükran li-hâzihi'n-niʻam hıdemât-ı meʼmûresinde istikāmet üzere hareketi elzem iken, seylâb-ı binâ-yı iʻtibâr u rağbet ve âteş-i harmen-i sükûn u râhat olan hırs u tama‘-1 bî-şümâr çeşm-i basîretine perde-dâr olup, fürûhtuna me'mûr olduğu Karadeniz İnce Donanması'ndan hâsıl olan akçeyi ber-vech-i noksân cânib-i mîrîye teslîm ile fazlasını endâhte-i sandûka-i kitmân ve çavuşun takrîri üzere kayıkların birini Moskovlu'ya sırran fürûht ile iktirâf-ı cürm-i bî-pâyân eylediği ve müceddeden Tersâne-i ʻâmire'ye verilan nizâm mûcebince dâyire-i maʻîşeti tevsîʻ ve beyne'l-akrân rütbesi terfîʻ olunmuşiken, [182b] ber-muktezâ-yı cibillet hıyânete cesâret ve bâ-husûs Donanma-yı hümâyûn'un hareketi hilâlinde liman reʼîsleri maʻrifetiyle tertib olunagelan edevât-ı sefâyinde kusûr etmâmek tenbîhâtı tekrîr ve da‘vet-i kazâ olunmamak sûretleri takrîr olunup, Donanma-yı hümâyûn Âsitâne'den fekk-i lenger ve Akdeniz tarafına feth-i şukka-i zafer eyledikde, verdiği âlât-ı telâtum-ı deryânın ednâsına tehammül etmeyüp, 'iyâzen billâh sefînelerin bir ikisi kazâya dûçâr olacak menzile geldikden gayri, iki üç seneden berü Bodrum'da Kapucu-başı Süleymân Ağa maʻrifetiyle inşâsına ibtidâr ve şimdiye dek külliyetlü mâl sarf u nisâr olunan sefînenin ikmâli haberi Kapudân Paşa hazretlerine vâsıl olup, deryâya indirilmesiyçün müşârûn ileyh bi'n-nefs Bodrum'a varup, Liman Re’îsi'nin verdiği âlât ile geminin deryâya indirilmesinde hayli ‘usret çekildiği meşhûd ve hakkında dûd-ı nâr-ı gazab âsumâna memdûd olup, ne hâl ise gayzını ızmar ve Âsitâne-i saʻadet'e geldiği gibi tarafına verilân istiklâl hasebiyle merkūmu ve direkçi bir nefer zimmîyi küşte-i seyf-i hûn-bâr etdikden sonra vukûʻ bulan keyfiyyeti ber vech-ı tafsîl Bâb-ı ʻÂlî'ye terkīm ve derhâl huzûr-ı Dâverâne'ye 'arz u takdîm olundu.