Hâlâ Şâm Vâlîsi ve Mîrü'l-hâcc Vezîr Cezzâr Ahmed Paşa'nın kalem-rev-i hükûmeti olan aktâr-ı Şâmât u Hicâz'da ve lûle-i heybet ü sevreti tanîn-endâz-ı mesâmiʻ olmakdan nâşî, o havâlîde mütemekkin baʻzı nâs mübtelâ-yı havf u hirâs ve bu cânibde sâkin olan hem-râzlarını iştikâya igrâ ve birkaç defʻa zulm ü teʻaddîsinden bahs olunarak hakkında refʻ-i rukʻa-i şekvâ olunmuşidi. Müşârun ileyhin kuvvet ü mikneti hasebiyle İmâret-i Hâcc'ı ʻalâ-tarîkı's-suhûle idâre ve aʻrâb-ı bevâdî vakt ü zemânında gubâr-ı fesâdı isâre edemeyüp, terk-i niyyet-i igāre ile fekat muʻtâd u mukannen [177a] olan şey'-i tahsîl zımnında kandîl-i niyâzı inâre eylediklerinden fazla hâzır bu gāyile müntefî ve âteş-i sûriş ü fiteni muntafî iken, tecribe olunmamış bir vezîrin bu hatb-ı cesîme takrîbi tevlîd-i hatar eyleyeceği bedîdâr u melhûz ve kemâ-kân ibkā olunması zamîr-i âfitâb-ı tenvîr-i Mülûkâne'de muzmerr u mahfûz olmuşidi. Ancak bu ʻavârızât ile müşârun ileyhin ʻazli şâyiʻ olacağı ve mukaddemce ibkāsı vâkiʻ olmadığı sûretde beyne'n-nâs kadri zâyiʻ olacağı Kapu Kethudâsı olan Süfyân Ağa tarafından bi't-takrîr inhâ olunup, takrîri hâk-i pây-i Mülûkâne'ye takdîm ve ibʻâs u ibkāsı husûsu taraf-ı Sadrı's-sudûr'dan dahi tergīb ü ihsâs olundukda, müsâʻade-i hümâyûna makrûn ve fi'l-hâl Kapu Kethudâsı'na ilbâs-ı hilʻat kılınup, ʻazl ü nasb-ı imâret-i Şâm husûsunda defʻ-i şükûk u zunûn kılındı.