Birkaç günden berü cevv-i semâda kesâfet tevellüd ve basît-i gabrâda âteş-i şu‘le-gîr-i harâret tevakkud edüp, nazm; Ne-bûd âb ki gerdîde ez-fevvâre revân, / Ki'z germî-yi hevâ bahr-ı birûn girde-zebân, / Hâk ez-tâbiş hûrşîd-i bî-haddî şode germ, / K'âteş ez-bîm-i harâret şode der-seng nihân. mazmûn-ı ‘ibret-nümûnu lisân-ı hâl-i eyyâmda mezkûr ve kâffe-i nâs iltihâb-ı kûre-i nâriyye ile tefsîde-leb ü mahrûr olup, çeşme-i hûrşîd şiddet-i germî-yi harâretle bîrûn-ı yübûset ve inzırâm-ı kânûne-i fasl-ı sayf ile cedâvil ü enhâr, rüsûb u güm-şüde-i rutûbet olduğuna binâ'en, hübûb-ı neseme-i ‘inâyet-i Mürsilü'r-riyah'a efrâd-ı mahlûkāt-ı sîne-güşâ-yı intizâr ve nüzûl-ı katarât-ı emtâr u bârân ile i‘tidâl-i hevâya kâffe-i ‘âlem dest-i berdâşte-i dergâh-ı Perverdigâr iken, işbu Zilhiccetü'ş-şerîfenin yigirmi yedinci ve fasl-ı Temmuzun yigirmi beşinci günü ki, gayheb-i şâm kenâre-i ruhsâre-i mühre-i perde-keş-i zalâm olduğu hengâm idi, şerâre-i berk-i şu‘le-fürûz, tetâbuʻ u ittisâl ile leyl-i mazlam u târı mânend-i rûz edüp, esvât-ı hâyile-i raʻd birkaç sâʻat mümtedd olmağla, râhat-ı güzînân kâşâne-i gaflet ü gurûru îkāz u irkād ve gerden-keşân-ı ribka-i itaʻat-ı Bârî olan kühen-kârân-ı nâsı seccâde-nişîn-i zehâdet ü irşâd edüp, pey-der-pey sâkıt olan gays-ı şedîdü'z-zuhûr arz-ı kafrâyı müşâbih buhûr ve belki nümûne-nümâ-yı vifârü't-tennûr edüp, ʻale's-sabah bu hâlet-i hûş-rübâ fazl-ı Bârî ile mündefiʻ ve kesâfet-i gamâm münkaşiʻ olup, redâ’et ü vehâmet-i arzıyye zâyil ve cevher-i hevâda [174b] safvet ü letâfet hâsıl oldu.