Erâzî-yi maʻmûrede vâkiʻ olup, devlet ‘unvânına şâyeste olan ekālîm-i 'örfiyyede Avrupa devletleri umûr-ı ticaretlerini rü’yet içün bir elçi vazʻ vü temkîn ve mesârifât-ı zarûriyyelerin gazete evrâkından hâsıl olan mebâliğden havâle vü taʻyîn eylediklerinden fazla o memleketlerde peyveste-i mevki‘-i iştihâr olan sanâyi‘-i ber- güzîde ve bazâyi'-i pesendîdeyi kavlen ve fiʻlen tahsîl ve ânen-fe-ânen aktâr-ı cihânda hüdûs eden ahvâl-i mugāyeretü'l-evzâ‘ı zabt u tahrîr ile fâyide haberi memleketleri halkına tavsîl ve memleketlerinde ikāmet eyledikleri düvelin devletleri hakkında hüsn ü sû-i niyyetlerin ihsâs u teferrüs ve vakt ü zeman güzerân olmadan ihbâr u iʻlâma [172b] müsâraʻatla mesâlih-i devletlerin tehvîn ü teshîl eyledikleri nezd-i ferd-i Şâhâne'de mütehakkık olup, Devlet-i ‘aliyye tarafından dahi müsâleme vü mesâfât üzere olan devletlere birer müsta‘idd ü reşîd elçi ta'yîn olunup, ahvâl-i düvele vakıf ve fünûn-ı riyaziyyeye bi'l-mümârese 'ârif olup, âbisten-i eyyâmdan tevellüd eden havâdisâtı tahrîr ü işâret ve bi-fazlihî Teʻâlâ tezâʻuf ü tekessürü irâde olunan sefâyin-i İslâmiyye'nin ticaretle o taraflara seyr ü seferleri tehakkuk eyledikde erbâb-ı ticaret ü bidâ'atin umûr u husûslarını rü’yet ve hilâf-ı ‘uhûd vukūʻ bulacak mazarratdan vikāye vü himâyet ve üç senede biri irsâl ve müddeti tekmîlinde âhiri ibdâl olunmak havâlî-kerd-i zamîr-i Şâhâneleri olup, tarîk-i suhûleti fî-külli vaktin ve ân-ı tefekkür ü teʻakkul ve şimdiye dek vukūʻu gayr-i meşhûd olan vaz‘-ı hâdisin defa‘ten hayyiz-resân-ı husûl olması müteʻassir görülüp, emr-i tedrîc ve teʼennî ile sûret-yâb olması mülâhaza vü tehayyül olunur idi. Çünki Françelü'nün Devlet-i ‘aliyye'ye temahhuz u ihtisâsı sâyir devletlerden vâfir olduğu zâhirdir. İbtidâ-yı emrde kendüleriyle bu husûs müzakere olunup, baʻde'l-istikrar sâyir düvelin kabûl-i mâdde ile 'özr ü behâne edemeyecekleri mütebâdir-i ezhân olmuşidi. Ancak bu hılâlde tehaddüs eden şûriş ü ihtilâl ve 'adem-i râbıta-i hâl takrîbi ile Devlet-i 'aliyye tarafından vilâyetlerine elçi irsâl olunmak Françelü ile el-yevm muhârib olan düvele bâʻis-i inkisâr-ı bâl olacağı ba'îd 'ani'l-ihtimal olmadığına binâ'en, mâdde-i mezkûre Devlet-i İslâmiyye ile kurûn-ı mâziyyeden berü silm ü salâh üzere olup, Devlet-i ‘aliyye ile dahi katʻâ muhârebesi vukūʻ bulmayan İngiltere [173a] lü'nün Âsitâne'de mukīm elçisi ile bi'l-müzakere karâr-gîr-i nizâm ve maslahat-ı mezbûre netîce-bahş-ı hıtâm olup, sâbıkā Kalyonlar Kâtibi Yûsuf Âgâh Efendi'nin bu hıdmete ehliyyet ü kābiliyyeti derkâr olduğundan, akrânına takdîm ve Orta Elçilik hilʻati ile tefhîm olunup, İngilterelü'ye irsâl olunacak hedâyânın ve Efendi-yi mûmâ ileyhin o tarafda ikāmeti hilâlinde mesârifine lâzım gelan meblağın bundan sonra nizâmına şürûʻ olunmak tedbîri tasvîb olundu.