İşbu Şevvâlü'l-mükerrem bidâyetinde kānûn-kadîm-i Devlet-i ebedd-müddet üzere tevcîhât vukūʻ bulup, hademe-i Bâb-ı ‘âlî ibkā olunup, fakat Teşrîfâtcılık sâbıkı Mehmed Na'îm Efendi'ye sezâ-vâr görülüp, Şıkk-ı Evvel ve Îrâd-ı Cedîd defterdârları ve Şıkk-ı Sâlis makāmlarında takrîr ve Nişancılık ve Defter Emâneti ve Rûznâme ve Muhasebe-i Evvel menâsıbı ile leff ü neşr-i müretteb kāʻîdesi üzere Doğramacı-zâde 'Abdullah Efendi ve Dürrî Efendi ve Seyyid Mehmed Efendi ve Râtib Efendi tebşîr olunup, emânetlerden fakat Arpa Emâneti hilʻatı Şâh Sultân Kethudâsı İbrâhîm Efendi'ye iksâ ve sâyirler ibkā olunup, Anadolu Muhasebesi fî-gudivvi ve'l-âsâl [160a] vekāyi'-i devlet tahrîriyle iştigāl eden 'Abd-i nâ-kâma lâyık görülüp, Süvârî Mukābeleciliği ile İsmâ‘îl Paşa-zâde Mustafâ Bey ferhân ve Yeniçerî Kâtibi ile Çelebi Mehmed Efendi şâdân olup, Haremeyn Muhasebeciliği ile Sivasî Hasan Efendi mazhar-ı lutf u ihsân ve sâyir menâsıb dahi erbâbına tefvîz olunup, baʻzı tehî-destân-ı zemân dahi nâyil-i ‘atâyâ-yı Pâdişâh-ı devrân oldu.