Kānûn-nâme'de tasrîh olunduğu üzere Tophâne Ocağı'na bâʻis-i tezâyüd-i şân olmak kasdıyla bir tûğ verilmek tasmîm olunmuşidi. Şehr-i mezkûrun on yedinci günü Nâzır-ı mûmâ ileyh ve Topçu-bâşı ve Kâtibi ve kethudâları Bâb-ı ‘alî'ye ihzâr olunup, tûğ-ı zafer-fürûğu Sadrıaʻzam hazretleri kāyim olduğu hâlde baʻde't-telsîm Topçu-başı'ya teslîm ve ocağlarının [156b] kānûn-nâmesini Re'îsülküttâb Efendi Topçular Kâtibi'ne verüp, tûğ-ı mezkûru Ocak Kethudâsı ve kânûn-nâmeyi Topçular Kâtibi dest-ârâ-yı taʻzîm eylediler. Bu hâl ile Bağçe Kapusu'na gelüp, Nâzır Efendi yedi çifte ve Topçu-başı beş çifteye süvâr ve Tophâne İskelesi'ne güzâr ve mukaddemâ saff-beste-i intizar olan Ocağlu icrâ-yı resm-i istikbâl ve rekz-i tûğ-ı Tûbâ-misâl hılâlinde zebh-i karâbîn ve kānûn-nâme ʻalâ-mele'i'n-nâs kıraʼât olunup, sadâ-yı duʻâ-yı bekā-yı Şehinşâhî mevsûl-ı eflak-ı heştümîn kılındı.