Devlet-i 'aliyye'nin îrâdı kalîl ü nezîr ve vakt-i hâle nazaran mesârifi gāyet kesîr olmakdan nâşî, idâre-i umûr-ı zarûriyyede müstevfiyân-ı vakt mübtelâ-yı müzâyaka vü makt olup, baʻzı tasarrufât-ı ‘akliyye ile teksîr-i îrâd ve fukarâ vü zuʻafâ-yı memlekete bâr-girân olmayacak derecelerde mîrîye imdâd ile lede'l-iktizâ mukāvemet-i a‘dâ-yı bed-nihâde kesb-i isti‘dâd etmek vâcibât-ı umûr-ı mülkiyyeden olduğuna binâ'en, ittifak-ı ‘ukalâ ve tedbîr-i vükelâ ile kalemlerinde mukayyed olduğu vech üzere refte refte vâfir îrâd îcâd olunup, ber-vech-i istiklâl idâresine ve fenn-i riyâzîden maʻdûd olan tertîb-i cedîd üzere bu esnâda taʻlîm ü âzmâyişleri matlûb olan ‘asâkirin levâzım-ı zarûriyyeleri [155b] tesviyesine ver her bâr taʻlîm ü teʻallüm ve meşk-i kâr-zâr ve tesâmüm-ı mesâlihine ‘uzmâ-yı ricâl-i devletden bir zât-ı müteşahhısın taʻyîn ü tahsîsi lâzım gelüp, sâbıkā Sadrıaʻzam Kethudâsı Reşîd Mustafâ Efendi bu hıdmet-i lâzımü'l-i‘tinânın ‘uhdesinden gelmege kādir olduğu maʻlûm-ı erbâb-ı basâyir olmağla, şehr-i mezkûrun on üçüncü günü huzûr-ı Asâfî'de mûmâ ileyhe ilbâs hilʻat olunup, Defter-i Teşrîfât'da mesbût olan imtiyâzât ile mahsûd-ı emsâl ve beher sâl elli bin guruş meʻâş ile müreffehü'l-hâl oldu.