Nemçe İmperatoru'nda Tuşkana Dükalığı karâr edüp, imperatorluk tetevvücü dahi hâsıl olduğundan mâddeteyn-i mezkûreteyni şâmil iki kıtʻa nâmesini Der-'aliyye'de mukīm elçisine irsâl etmişidi. Elçi-yi mersûm henüz devleti tarafından gelmiş sûretinde icrâ-yı resm dâʻiyesinde olmağla bi-hasebi'l-vakt ve'z-zemân müsâʻadeye karîn ve ber-kā‘ide mihmândâr nasb ü taʻyîn olunup, Rûz-merre mesârifi cânib-i mîrîden tertîb ü tanzîm ve işbu Cumâdelâhıre'nin yigirmi sekizinci günü elçi-yi mesfür Bâb-ı ʻâlî'ye gelüp, hâmil olduğu iki kıtʻa nâmeyi ʻalâ-hidetin taraf-ı Sadrıaʻzamî'ye takdîm eyledikde, kā‘ide-i Devlet-i ebed-müddet üzere mesfûra ve maʻiyyetinde olan iki nefer tercemân ve begzâdegân ve sâyire kürkler ve hilʻatler ilbâs ve tahsîl-i mekāsıd-ı müvâlefet ü istînâs olundu. Âsitâne-i saʻâdet'de bu esnâda lahmın kılleti olup, mahall-be-mahall Kassâb-başı ʻOsmân Ağa'nın tekâsülüne haml olunmuşidi. Ancak enhârın tuğyânı ve mevsim-i şitânın şiddet ve temâdî-yi zemânı yollara sedd ve ebnâ-yı sebîli bile iyâb u zehâbdan men' ü sadd eylediği tahkīk olunmağla, etrâf-ı Âsitâne'de vâki' olan çiftliklerden ve Edirne'den araba ile sevk-i agnâm iltizâm olup, fî'l-cümle kıllet-i lahm gāyilesi münʻadim ve mûmâ ileyh vukūʻu muhtemel olan mükedderâtdan sâlim oldu. Mîrahûr-ı Evvel olan Mehmed Ağa bu bu sâl-i meyâmin-iştimâlde Hacc-ı şerîfe niyyet etmekle, mansıb-ı mezkûr ile Çayır-zâde İbrâhîm Ağa mesrûr oldu. İrâde-i Şehriyâr-ı [155a] Felâtûn-reviyyet ve etbâk-ı vükelâ-yı devlet ile karâr-gîr-i sübût olan kānûn-nâmede tafsîl olunup, vüzerâ-yı ʻizâm ve Mîr-i mîrân-ı kirâm ve sâyir erbâb-ı nakz u ibrâma neşr ü iʻlâmı lâzım gelan şürût-ı cedîde sûretleri bu esnâda ısdâr u irsâl olunup, hilâfına dâyir hareket ü ʻamel vesîle-i da‘vet-i ecel olacağı iblâğ "Ve kad aʻzera men enzera" misillü takdîm ü isbâğ olundu.