Elçi-yi kebîr olan Râsih Paşa'nın vakt ü hareketi tekarrub etmekden nâşî Moskov tarafına irsâl olunacak hedâyâ-yı mu‘tâdenin teslîmi lâzım gelmekle hedâyâ-yı hümâyûndan olup, sun' u nescinde mühre-i zemân vâlih ü hayrân olan sâyebân-ı Kum Meydanı'na nasb olunup, eczâ vü müştemilâtı bi-kemâlihâ manzûr-ı kâr-fermâyân oldukdan sonra sâyir hedâyâ ile Paşa-yı mûmâ ileyhe teslîm ve Cemâziyelâhıre'nin on beşinci günü Ağabahçesi'nde rikâb tasmîm ve Sadrıaʻzam ve Şeyhulislâm hazerâtı mevcûd oldukları hâlde, Paşa-yı mûmâ ileyh ‘arzia duhûl ve ihrâz-ı rütbe-i kıyâm u müsûl edüp, nâme-i hümâyûn yedine i‘tâ ve derârî-yi vesâyâ-yı Mülûkâne tabakçe-i hâfızasına ilkā olundukdan sonra, dûş-i sadâkat-pûşına hil‘at-i semmûr iksâ olundu. Şehr-i merkūmun yirmi altıncı günü Şehriyâr-ı mekârim Redîf Alay Köşkü'nü teşrîf buyurup, Sefîr-i mûmâ ileyh dahi hânesinden alay ile hareket ve darb-ı tabl ruhsatına neyl ile Alay Köşkü altına gelüp, râcilen [153a] icrâ-yı merâsim-i hâk-bûsî vü tahiyyat etmekle fî'l-hâl semmûr kürk ilbâs ve debdebe-i iʻtibârı bu vesîle ile felek-i mümâss olundu.