Segirdim miyânelerinde aşcı bulunanların senede ikisi irsâl-i lihye ile çerâğ ve kānûnları üzere baʻzı mahallere kâhî tevzîʻiyle sermâyedâr-ı vüsʻat-i hâl ü rifağ olurlar idi. Giderek neşr-i kâhî esâfil-i nâsa müntehî olup, Ocâğ-ı ‘âmire'ye mûris-i şeyn ü noksâniyyet olduğu maʻlûm-ı hazret-i Şehinşâhî olmağla, sıyânet-ı ‘arz-1 ceyş-i mansûr kasdıyla o makūle enzâl-i ‘avâma dest-güşâ-yı tezellül olmaları menʻ olunup, gâhî tevziʻi vaktinde fekat taraf-ı hümâyûna ve Darü's-saʻâde Ağası'na ve Silah-dâr-ı Şehriyârî'ye birer tâbe [137b] ve Sadriaʻzam ve Kethudâ Bey ve Defterdâr Efendi ve Re'îsülküttâb Efendi ve Çavuş-başı Ağa'ya ve Ocağlu ricâline birer tâbe kâhî takdîm ve taraf-ı vâzıhu'ş-şeref-i Mülûkâne'den altı mâhda bin beş yüz guruş ihsân u teslîm ve bâlâda zikr olunan zevât taraflarından dahi muktezâ-yı tefâvüt-i merâtib üzere birer mikdar meblağ i‘tâ olunması evâsıt-ı Zilka‘de'de tertîb ü tanzîm olunup, işbu kānûn-ı cedîd kavânîn-i kadîmeye muzâf ve sâyir ‘avâm-ı nâss bu teklîf-i ‘anîfden muʻâf olup, ol bâbda şeref-rîz-i sudûr olan hatt-ı hümâyûn Ocâğ-1 ‘âmire'de mahfûz ve Ocağlu zümresi bu şîme-i mülûkiyyeden gāyetü'l-gāye münbasit ü mahzûz oldu.