Hasm-ı hadîʻa-kâr köprüsünü inşâ edüp, ‘askerinin nısfını Maçin tarafında olan adaya imrâr eyledikde köprüsü kırılup, nısf-ı âharı Kalas sâhillerinde kaldığından hâlleri dîger gûn ve şâyed Maçin tarafından kazıyyeye vukūf ile şeb-hûn olunur fikri ârâm-rübâ-yı karâr u sükûnları olup, hele [102b] ne hâl ise etrâf u eknâfdan 'amele ihzâr ve tekrar köprüyü bünyâd eylediklerini Kalas'a ‘azîmetimizde köprü binâsında bi'z-zarûre mevcûd olan üserâ-yı İslâmiye'nin baʻzıları ihbâr ve teveccuʻ vü teʼessüf izhâr eylediler. Böyle bir fursat-ı ‘azîme müyesser olmuşiken hâyiz-i gumâr-ı gaflet olan Serʻasker Paşa vâkıf-ı hâl olmayup, mütelâşî vü intisâf kabûlüyle hâzır-şikâr sûretini kesb eden düşmeni pâ-mâl-i senâbikü'l-hayl-i İslâm itmamek da‘vâ-yı fütüvvet ü diyânete menâfî olduğu gayri hafîdir. Aʻdânın taraf taraf berü câniblere murûru Maçin Serʻaskeri müşârun ileyh tarafından rivâyet ve Ordu-yi hümâyûn'a pey-der-pey tahrîr ü işâret olunur iken, köprünün infisâhı kazıyyesine vâkıf olmamak serâyir-i şinâsân-ı melâhim ü vekāyiʻ olan talâyiʻin a‘dâya karîb muvâkaʻa ber-vech-i münâvebe taʻyîn olunmamasından neş'et eylediği mahall-i nizâʻ değildir. Sadrıaʻzam mukaddemâ Hırsova'dan hareket eyleyeceği hengâmda ‘askerin mizâcında fesâd ve rü'esâda şikāk u ‘inâd olduğunu idrâk ile perîşânlık vukūʻunu sûret-i tetayyurda tezekkür edüp, hattâ hîn-i mukābelede şâyed ‘asâkir-i İslâm'a tefrika ‘ârız olup, gāyet-i emrde mevâdd-ı musâlaha ‘usret kabûl eder zannıyla sulhu cenge tercîh ve Moskov ceneraliyle muhârebeye şürû' eyleyeceğini Kethudâ Bey'e ifâde ü tasrîh etmişidi. Devlet-i 'aliyye'nin itlâf-ı hazâyin ile ictimâʻ eden ‘askeri a‘dâ ile rû-be-rû olup, gālib ü maglûb maʻlûm olmadan maslahat-ı musâlahaya meyl ü rağbet, izhar-ı cübn ü rehâvet kabîlinden olduğu zâhir ve bu sûret ile musâlaha mizâc-ı hümâyûna mugāyir olup, bu kazıyyeyi baʻzı hayr-hâhân-ı Devlet Kethudâ Bey'in kavlini teʼyîd vü tevsîk eylediler. Maçin perîşânlığı vukūʻunda Kethudâ Bey'e ve men‘-i muhâberede hem-dest-i ittifâkî olanlara Sadrıaʻzam sitem ü itʻâb edüp: "İşte bu keyfiyyetin vukūʻuna sebeb siz oldunuz. Benim re'yime mütâvaʻat [103a] ediniz. Bu câr-ı silk vukū bulmayup, şân-ı Devlet yerinde iken belki mizâc-1 vaktine muvâfık bir maslahata zafer-yâb olmak mümkin olur idi." diyerek izhâr-ı nedâmet ve fevt-i fursat zuʻmuyla iʻlân-ı teveccuʻ vü melâmet eyledi. "Reca ‘nâ ilâ mâ nahnü fîhi" sevk-i kazâ vü kader ile vukū bulan keyfiyyet ‘akd olunan meclis-i meşveretde mevcûd vüzerâ ve ocağlu ve ricâl ve sâyir rü'esâ-yı ‘asâkir mahzarlarıyla ‘atebe-i Mülûkâne'ye ‘arz u tahrîr ve müteʻayyinân-ı ricâl-i Devlet'den biriyle Dergâh-1 vâlâ'ya ref olunmak karâr-gîr-i ehl-i tedbîr olunup, Çavuş-başı Ağa'nın ‘azîmetini Sadrıaʻzam istihsân ve Ağa-yı mûmâ ileyh hıdmet-i mezkûreden istinkâf ile baʻzı mevâni îrâd u beyân eylediğine binâ'en, Sadrıaʻzam izhâr-ı infiʻâl ve İç Çukadârı'nı der-ân-sâʻat mahzar ile Asitâne'ye irsâl eyledi.