İşbu Şevvâlü'l-mükerrem'in on ikinci Cuma günü Ordu-yi hümâyûn'da tevcîhât olup, kapu ricâli ibkā ve Muhâsebe-i evvel mansıbı, sâbıkā Kethüdâ-yı Rikâb İbrâhîm Efendi'ye ve Süvârî Mukābelesi, Kara Hâfız Efendi'ye ve Yeniçeri Kitâbeti, Râtib Efendi'ye ve Sipâh Kitâbeti, Lala Mehmed Efendi'ye ve Mevkūfât Yazıcı-yı esbak Ayasofyalu Mustafâ Efendi'ye tevfîz olunup, sâyir menâsıb dahi müstehaklarına ibkā vü tevcîhe ve lâzım gelenlere ikāmet ü ‘azîmet hâletleri ifâde vü tenbîh olundu. Kezâlik Âsitâne-i saʻâdet'de dahi tevcîhât vukū‘ bulup, [93a] hidmet-i Kāyim-makāmî'de olan ricâl-i Bâb ibkā ile feyz-yâb ve fekat Teşrîfât Vekâleti'yle Edîb Efendi pâ-ber-câ-yı merkez-i intisâb ve Baş-muhâsebe Vekâleti'yle 'Ali 'Arif Bey tatyîb ve Tersâne Emâneti'yle tabîʻatı vekāhat ü mücûna mâyil olan Kıbrısî ‘Ali Ağa tatrîb ve Matbah Emâneti, İstanbul Gümrükçüsü bulunan Selânikî Küçük Hasan Ağa'ya ihâle ve Arpa Emâneti ile Tütün Gümrükçüsü olan ‘Osmân Ağa'nın mezraʻa-i emeline cûy-bâr-ı ‘inâyet isâle ve Anadolu Vekâleti'yle Feyzî Bey-zâde Mehmed Beyefendi'nin münkesir-i dest-i hâdisât olan âb-gîne-i hâtırı mecbûr ve Mukābele Vekâleti'yle Memiş Efendi nâyil-i etemm-i surûr olup, Cizye Muhâsebesi bi'l-asâle ‘ismetlü Şâh Sultân Kethudâsı'na tevcîh ve sâyir menâsıb ile bekāyâ-yı hademe-i Devlet temvîh olundu.