İşbu şehr-i Recebü'l-mücerreb'de Bosna Eyâleti, Hersek Sancağı ilhâkıyla sâbıkā vâlîsi olan Vezîr el-Hâc Sâlih Paşa'ya ibkâ ve Çirmen Sancağı Ordu-yi hümâyûn Konakçılığı şartıyla Mîr-i mîrân'dan Tâhir Paşa'ya ve Paşa-yı mümâ ileyhin birâderi Rüstem Bey'de âsâr-ı merdângegî meşhûd olmakdan nâşî zümre-i Mîr-i mîrân'a [87b] ilhâk ve Pererzin Sancağı tevcîhiyle mazhar-ı eşfâk kılınması Rumeli Vâlîsi tarafından istidʻâ olunduğuna binâ'en, mûmâ ileyh Pererzin Sancağı inzımâmıyla müceddeden Mîr-i mîrânlık i'tâ olunup, sâbıkā Sivas Vâlîsi Vezîr ‘İzzet Paşa'ya Mısr-ı Kāhire Eyâleti ve selefi Vezîr İsmâ‘îl Paşa'ya Mora Eyâleti ihsân ve Divrikli Vezîr Köse Mustafa Paşa hakkında mahâyil ü celâyil-i ‘inâyet-i Mülûkiyye nümâyân olup, vezâreti ibkā ve hâl-i cimâl-i ‘Arabistân olan Eyâleti-i Halebü'ş-şehbâ ile kâm-revâ kılınup, selefi Turunc-zâde Süleymân Paşa dahi Adana Eyâleti ile taltîf ve seferber vüzerâ-yı ‘izâmdan Cere-zâde Ahmed Paşa'nın Maraş Eyâleti ile sâmi‘a-yı âmâli teşnîf ve Silistre Ser‘askeri Vezîr Karahisârî Ahmed Paşa Eyâlet-i Sivas ile nâyil-i merâm ve sâbıkā Çirmen Mutasarrıfı ve bu defa Mesuri muhafazasına me'mûr Mîr-i Mîrân Kara Mehmed Paşa'ya Bosna Kilîsi Sancağı'yla ikrâm olunup, Küçük ‘Ali-zâde Halîl Paşa'nın dahi cerâyim-i güzeştesine kalem-i ‘afv keşîde ve Mîr-i mîrânlığı ibkāsıyla ‘Üzeyir Sancağı ‘uhdesine süpürde kılındı.