Müşârun ileyh ‘Abdî Paşa-zâde ‘Ali Paşa'nın ferzend-i dil-bendi olup, pederi vefâtından sonra Sultân Mahmûd ‘aleyhi rahmetü'l-Ma‘bûd devrinde Enderûn-1 hümâyûna çerâğ ve bir müddetden sonra Hâsoda'ya duhûl ile pâ-nihâde-i mirkāt-ı refâh u rifâğ olup, giderek fenn-i [55b] silahşörîde yegâne ve cevdet-i kitâbetde vahîd-i zemâne olduğu haysiyyet ile günden güne mihr-i vakʻ u iʻtibârı dırahşân ve Çukadâr Ağalık merkezine vüsûl ile fâyikü'l-akrân olmuşidi. Müşârun ileyhden bir bâdire südûruyla dâyire-i hümâyûndan tecnîb ve Mîr-i mîrânlık ile Köstendil tarafına tesrîb olunup, çok geçmeden Belgrad nizâmına me'mûr ve serkeşân-ı Belgrad'ı izâlede hıdmeti meşkûr olup, nâyil-i rütbe-i vezâret ve bir zemândan sonra, kati çok Yeniçeri katletti deyü Ocak tarafından şikâyet ile mazhar-ı ‘ukūbet olup, bu gāyileden dahi reh-yâb-ı selâmet ve kati çok eyâlete tevellâ ile vâsıl-1 ser-menzil-i şöhret olmuşidi. Müşârun ileyh fi'l-asl zulm ü hasârete mâyil ve muhafaza-i nefs dâʻiyesiyle her zemân dâyiresi mecmû‘-1 erâzil olup, ne tarafa teveccüh etse ehâlîsi perîşân ve ne memlekete Vâlî olsa o memleket yevm ü gurâba âșiyân ve bu sebeble matla‘-ı vezâretinden gāyet-i 'ömrüne dek Devlet-i ‘aliyye'ye nâfi bir hıdmete muvaffak olamayup, evvelki seferlerde dahi her mahalde münhezim ve tarafında isr-i nusreti münʻadim olduğundan gayri, Haleb ve ‘Ayıntâb ve Kilis ve Ağraz'ı tehzîb ü ifnâ ve Anadolu ve Rumeli'de kat‘i çok müteʻayyin ve bî-cürüm kimesneleri i‘dâm ile havâtir-i nâsda siyâsetnâme-i Haccâc'ı ensâ ve bâlâda zikr olunduğu minvâl üzere Belgrad'ın istîlâsına dahi 'illet-i müstakılle olup, birkaç def‘a izâlesi kasd olunmuşiken mâlını nefsine fedâ ve kesret-i havâşî vü hademi siper-bilâ etmekle vücûduna zafer mümkin olmayup, encâm-ı kâr eceli ile 'azm-i dârü'l-cezâ eyledi.