‘Ali Râ'ik Efendi'nin Defterdarlık mansıb-ı celîli ile bekâm olması mukaddemâ irâde olunup, Kethudâ-yı sabık Hasan Efendi tehcîn-i mâdde eyleyerek nihânî te’hîr ve men'ine sa'y eylemişidi. Çünki esâsa dâyir mevâdd ile ‘Ali Râ'ik Efendi'nin Âsitâne'ye [51b] uhassas olup, keyfiyyet-i mezkûreye lâ-muhâle vakıf olacağını idrâk etmişidi. "Hîn-i vedâ‘da sizin defterdâlığınız gerçi irâde olunmuş, lakin gāyile-i mevacib ve hücûm-ı meşâkk ve metâʻib-i te’hîrini müstelzim olmağla Âsitâne'ye varup geldikden sonra, mansıbınız hâzırdır" kelâmıyla sarf-ı irâdede olan cünha vü cinâyetini te'vîl etmişidi. Râ’ik Efendi ‘avdet edüp, zemân dahi mütehavvil olmağla, "Ve leyse lî-mâ şâ'e'l-ilahü müdafi‘ü" mefhûmu üzere te'yîd-i irâde-i sâbıka kasd olunup, şehr-i mezkûrun üçüncü günü mûmâ ileyh hasretü'r-ricâl olan mansıb defteri ile hâyiz-i rehîne-i meserret ve selefi Feyzullah Efendi'nin hâtır-ı münkesirine Defter Emâneti mûmyâ-yı tesliyet olup, Cizye Muhâsebeciliği ile Hûrşîd Süleymân Efendi'nin matla‘-ı âmâli tâb-dâr ve Sipâh Ağalığı'yla Berber Mustafa Ağa'nın âyîne-i derûnu cilâ-yâfte-i istibşâr ve Feyzî Bey-zâde'nin Âsitâne'ye me'zûniyyeti takrîbî ile Baş-muhâsebecilik hâlî ve mansıb-ı mezkûr ile dahi Kahveci-başı-zâde ‘Ömer Efendi'nin kadri ‘âlî ve mansıb-ı sâbıkı olan Yeniçerî Kitâbeti ile İsmaʻîl Paşa-zâde Yenişehirli Mustafâ Beyefendi dil-şâd ve Sipâh Kitâbeti ile Nüzül Emîni Ahmed Efendi ber-murâd oldu. Cezayirli Hasan Paşa'nın Deli-başısı olan ‘Osmân Ağa'nın yararlığı elsine-i nâsda meşhûr ve merâtib-i devlete ehliyyeti mezkûr olduğuna binâ'en, Kayseriyye Sancağı'yla Mîr-i mîrân zümresine ilhâk olunup, ibtidâ İsakcı ve baʻdehû Tutrakan muhâfazasına taʻyîn ve Yeniçeri Ağası olan Yahyâ Ağa'nın ru'yet-i umûrda kusûru müteʻayyin ve ‘azli muvâfık-ı [52a] re'y-i rezîn olmağla, birkaç def‘a Yeniçerî Ağası ve Kāyim-makām olan Hasan Paşa mansıb-ı mezkûr ile kemâ-kân tatrîb ve selefi Tekfürdağı'na tagrîb olundu. Mevsim-i behâr hulûl ve vakt-i rezm ü ceng duhûl eylediğine binâʼen, meştâ-yı Şumnu'dan hareket ve sahrâya nasb-ı hıyâm nusret-i ittifak-kerde-i erkân-ı devlet olmakdan nâşî, işbu Şaʻbân-ı şerîf'in yigirmi beşinci günü alay ile Şumnu sahrâsına rekz-i aʻlâm ve ihtişâd-ı ‘asâkire intizâran hıyâm-ı süreyyâ-intizâmda ârâm olundu.