Şehriyâr-ı sütûde-âsâr biniş tarîkiyle müntezihât-ı seniyyelerinden Kağıthâne'ye teşrîf buyurup, Kağıthâne fezâsında hayme-nişîn-i ikāmet ve Ordu-yi hümâyûn'a pâ-der-rikâb-ı ʻazîmet olan Binbaşı ʻArab Ağa'nın neferâtı, nazar-gâh-ı [23b] Pâdişâhî'de cirîd-bâzlık sanʻatını icrâ ve bu mukābelede Binbaşı'ya ve neferâtına vâfir zer-i meskûk iʻtâsıyla gazve vü cihâda tahrîz ü iğrâ kılındılar. Ve sâbıkā İzmir Voyvodası olan Hasekî Hacı ʻOsmân Ağa'ya dahi iki yüz dört senesinden zabt eylemek üzere Kıbrıs Muhassıllığı tevcîh ve birkaç günden sonra Kapucu-başılık ile kadri terfîʻ ü tenvîh olunup, Cihân-zâde Hüseyin Bey dahi sefere meʼmûren Edirne'ye karîb mahallere geldikde gāyile-i seferden tahlîs-i nefs zımnında müteneffisân-ı Devlet'e ʻarz-ı bûd ve ne-bûd edüp, ʻamel ü iştigāli mekmen-i husûlde cilve-ger ve seferden ʻafv ve Muhassıllık ile tekrâr kâm-ver oldu.