Şeyhulislâm-ı esbak ‘İvaz Mehmed Paşa-zâde İbrâhîm Beyefendi bundan akdem sevk-i kazâ vü kader ile Ankara'ya iclâ olunup, hevasıyla imtizâc edemediğinden, Burusa'ya nakl olunmasiyçün dâmen-gîr-i ilticâ ve hakkında sûret-i müsâʻade rû-nümâ olmuşidi. Kezâlik mahdûmları Mustafa Beyefendi sâhil-hânesinde me’mûren ikāmet ile tertîb-sâz-ı bezm-i sûz u güdâz ve sâbıkā Hekîm-başı Hayrullah Efendi Tâyif'de temekkün etmek üzere muhtâr-ı tarîk-i Hicâz olduğu sâmiʻa-res-i Şehriyâr-ı bende-nüvâz oldukda, üçünün birden ıtlâkına emr-i hümâyûn sâdır olup, Hayrullah Efendi'nin ıtlâk ve Âsitane'ye iltihâk fermânı pâ-der-rikâb-ı ʻazîmet olan Surre [9a] Emîni Çelebi Mehmed Efendi'ye iʻtâ ve Burusa'dan Âsitâne'ye gelmek üzere Şeyhulislâm-ı esbak müşârun ileyhe bir kıtʻa emr-i kazâ-mazâ isrâ ve mahdûmları dahi haber-i ʻavf ile tefrîh ve tercîh etdiği mahalde ikāmeti tasrîh olundu.