Müddet-i yek-sâleden berü sadrıazam kethüdâsı olan Esseyyid Mehmed Hayri Efendi bu defʿa dahi kudreti yetişdiği kadar hizmet-i mezkûrede izhâr-ı lâzıme-i sadâkat edüp bu esnâda muktezâ-yi surûf-i ezmân ile hiz- met-i mûrisü'l-behcet-i âsafîden dûr ve hânesinde ikāmet ile meşgûl-i du'â-yi şehriyâr-ı mekârim-nüşûr oldu. Devlet-i ebed-müddetde üç defʿa defterdâr-ı şıkk-ı evvel ve hâlâ nişancılık mansıb-ı celîli ile mübeccel olan Hasan Efendi öteden berü umûr-ı Devlet-i aliyye'de hâ'iz-i kasabü's-sebk-i mahâret ve yekke-süvâr-ı meydân-ı sadâkat olup husûsât-ı dakîka ve celîle-i devletde ikdâm ve himmeti bâliğ-i nisâb-ı nihâyet ve rü'yet-i masâlih-i ibâdda saʿy ü gayreti tasrîh ve kinâyet olunduğuna binâen mahzâ sevk-i hazret-i sadrü's-sudûr ile şehr-i mezkûrun onaltıncı sebt günü efendi-i mûmâ-ileyh sadrıazam kethüdâsı nasb olunup münhal olan nişancılık mansıbı dahi Lâlelili Mustafa Efendi'ye tevcîh olundu.