Medine-i münevvere lâ zâlet bi-envâri'l-ilâhiyyeti müsevvereten de baʿzı emâkin-i müteberrikenin muhtâc-ı termîm ve taʿmîr olduğunu bundan ak- dem şerîf hazretleri ve şeyhülharem ve sâirleri arz u tahrîr eylediklerine binâen zevât-ı (306-a) müteşahhısadan hüsn-i siyreti müteʿayyin ve hulûs-ı taviyyeti mütebeyyin bir şahsın hizmet-i mezkûreye me'mûr olması matlûb-ı şehriyâr-ı hayr-endîş olmuşidi. Dergâh-ı âlî kapucu başılarından Numan Bey'in salâh u takvâsı ve cânib-i Hicâz'a meyl ü hevâsı beyne'n-nâs müştehir olduğundan geçen sene hizmet-i mezkûreye taʿyîn ve müteveccih-i sûy-i Ravza-i seyyidü'l-mürselîn olup Medine-i münevvere'ye lede'l-vusûl emr-i taʿmîre meşgûl olup beş-on günlük maslahat kaldıkda tekmîlini baʿzı kimesnelere tavsiyeden sonra Bağdad cânibinden Âsitâne'ye avdet eyledi. Mîr-i mûmâ-ileyhin avdeti izn ü ruhsata mütevakkıf olup baʿde'l-izn şahrâh'dan azîmeti lâzım iken hod be-hod Medine-i münevvere'den fekk-i rıbıta-i me'mûriyyet ve tarîk-i cebelden Meşhed'e ve baʿdehû Bağdad ve Âsitâne'ye avdeti hilâf-ı rızâ-yı evliyâ-yı niʿama olduğundan fazla mîr-i merkūmun Bağdad'a vürûdu bir müddetden berü hâric-i Bağdad'da refʿ-i livâ-i isyân eden Şâvî-zâde Süleyman Bey'in muʿârekesi hengâmına tesadüf etdiğinden Bağdad'a baʿzı erâcîfin hudûsuna illet olduğu müheyyic-i gazab-ı mülûkâne olmağla binâen alâ-zâlik işbu şehr-i Recebü'l-ferdin yirmibirinci günü mîr-i mûmâ-ileyh li-ecli't-te'dîb Soğucak kalasına nefy ü tağrîb olundu.