Bir müddetden berü refʿ-i livâ-i tuğyân eden İskenderiye mutasarrıfı Mahmud Paşa'nın zulm ü taʿaddîsi (298-b) ma'lûm-ı enâm olduğuna binâen birkaç defʿa izâle-i vücûd-ı habâset âlûdiyle ibâdullahı irâhe matlûb-ı pâdişâh-ı muʿâdelet-penâh olup üzerine asker tertîb olunacağını hiss etdiği gibi makhûr-ı dest-i tasallutu olan kazâlardan hüsn-i hâlini müşʿir tahrîrât ahz ve der-i devlet-medâra irsâl eylediğinden gayri hakkında şâyiʿ olan ahvâl ü etvâr makūle-i erâcîfden olduğunu işʿâr ile tebriye-i zimmet ve iffeti tahsîl akabinde kemâfi's-sâbık tahrîb-i bilâd ve enhâ ve tecrîm-i reʿâyâ ve fukarâya mücâseret ede-geldiği merreten-baʿde uhrâ tecrübe olunup hattâ bu sene-i mübârekede Üsküb sancağı kazâlarına ve Manastır'a karîb nevâhiye ve Bosna'da vâkiʿ Nikşik ve Prepol semtlerine bölükbaşılar taʿyîn ve Karadağ ve İskenderiye havâlisinde mutavattın usât keferesinden maʿiyyetlerine vâfir kâfir koşup emvâl-i mîrîye tahsîldârlarını tard u tezlîl ve beytü'l-mâl-i müslimîni nefsiyçün cemʿ ve tahsîl eylediğinden fazla her bir kazâya mebâ- liğ-i bî-nihâye tevzîʿ ve kabz edüp irâde-i fâsidesine mümâşât etmeyen bey ve beyzâdeleri katl ve hânelerini ihrâk ve bu zerîʿa-i şenîʿa ile vedîʿatullah olan zuʿafâ-yı nâsı mukayyed-i visâk-ı meşakk eylediğine kanâʿat etmeyüp Devlet-i aliyye-i ebediyyü'l-karârın bu hılâlde serhadlere asâkir taʿbyesiyle iştigālini fırsat add ve dest-i tecâvüz ve taʿaddîsini her tarafa bast u medd edüp şakk-ı asâ-yı müslimîn ve hetk-i nâmûs-ı dîn eylediği müteʿayyin ve fî-mâ-baʿd ıslâhı gayr-i mümkin olmağla hakkında iʿtâ olunan fetvâ-yı şerîfe mûcibince izâle-i vücûd-ı nâ-sûduna hasr-ı sâʿid-i ihtimâm (299-a) ve Rumeli vâlîsi başbuğ nasb olunup üzerine berren ve bahren sevk-i ketâ'ib-i zafer-encâm kılınup mansıbı hâlâ Yanya mutasarrıfı mîrimîrândan Çavuşzâdeye tevcîh olundu.