Bundan akdem Boğdan voyvodası olan Aleksandra maktûl Ligor ile sefereden evvel Boğdan'da bulunup sefer vukūʿunda maʿan Rusyalu'ya esîr olmuş idi. Sulh akabinde Ligor ile Boğdan'a ve ba'dehû bi'n-nefs Asitâne'ye revâne olup bir müddetden sonra Dîvân-ı hümâyûn'da tercümân bulunan Nikola'ya dâmâd ve o hilâlde Eflâk voyvodalığı ile tercümân-ı mezbûr bermurâd oldukda dâmâdının kabiliyyet ve isti'dâdını îrâd ile tercümanlığı sevk u tergîb ve fi'l-asl Rusyalu'da ikāmeti kayd-ı isr ile otup beyzâdeliği dahi ma'lûm olduğundan (298-a) ihtimâl-i hıyânet verilmeyerek miyâneye tahallül eden Mihal'den sonra Dîvân-ı hümâyûn tercümânlığiyle tatrîb olunmuşidi. Mesfûr tercümânlık ile mesrûr oldukda matlab-ı aksâsı olan beyliği tahsîl zımnında hass u âma izhâr-ı temellük ve mesekenet ve o hilâlde Boğdan voyvodalığının münhal olacağını hiss edüp nihânî amele mübâşeret ile voyvodalığa dahi destres olup Boğdan'a vardıkda tedrîcî zulm ü udvâna ağâz ve refte refte derîçe-i hıyâneti bâz edüp tamamca reʿâyâyı izrâr ve taʿzîb ve Devlet-i aliyye'nin kilârı makāmında olan memleket-i Boğdan'ı ifsâd ve tahrîb etdikden sonra an-asıl müncezib olduğu Rusyalu diyârına firâr fikriyle Rusyalu'nun Boğdan'da mukîm olan konsolosuna keşf-i serîre-i zamîr ve sûret-i mümâşât müşâhedesinden sonra bir müddet dahi celb-i emvâl devâ'isiyle emr-i firârı te'hîr etmişidi. Hâin-i mesfûrun etvâr-ı nâ-hemvârından âsâr-ı hıyânet mahsûs olduğuna binâen celiyye-i hâline ıttılāʿ içün taraf taraf tecessüse ibtidâr olundukda fesâd-ı derûnu taʿayyün etmekle derhâl azl ü tenkîl ve Âsitâne'ye gelmesiyçün tarafına irsâl-i emr-i celîl olunup azlini tahkīk etdiği gibi iddihâr etdiği emvâl ve eşyâyı istishâb ve Moskov konsolosu delâletiyle Moskov'a gitmek üzere Leh'e firâr ü şitâb eylediğini vulât-ı serhad ve Boğdan boyarları lede't-tahkīk der-i devlet-medâra tahrîr ve tenmîk etmişler.