Hüdâvendigâr-ı sâbık cennet-mekân Sultân Mustafa Hân hazretlerinin kerîmesi Hadîce Sultân bundan akdem Anadolu vâlisi Vezîr Esseyyid Ahmed Paşa'ya nâmzed kılınmışidi. Bu esnâda dâʿiye-i akd ü tezvîc hâtır-ı mürüvvet-me'âsir-i pâdişâhîyi tehyîc eylediğine binâen vezîr-i müşârün-ileyh tarafına da'vetci gönderilüp hasbe'l-emrü'l-âlî müşârün-ileyh Kütahya'dan hareket ve şitâb ve sür'at ile Âsitâne-i saʿâdet'e vâsıl ve sarây-ı dil-küşâ-yı sultân-ı müşârün-ileyhâya nâzil olmuşidi. Vezîr-i müşârün-ileyhin Âsitâne'ye vusûlünün dördüncü günü ki Muharremü'l-harâmın onuncu günüdür, sultân-ı müşârün-ileyhâ ve vezîr-i müşârün-ileyhe akd olunup merkūmun onaltıncı çarşamba günü nakl-i cihaz irâde olunmağla erkân-ı devletden âlâya âmâde olmaları âdet olan ricâl-i bâ-vekār esvâb-ı dîvânî ile suvâr olup atiy- ye-i mülûkâne olan tuhaf-ı azîzü'l-menâl ve nütef-i adîmü'l-misâli sarây-ı müşârün-ileyhâya nakl ve ferdâsı perşembe günü sadrıazam-ı vâlâ-makām ve şeyhülislâm ve sudûr-ı kirâm ve ocaklu ve ricâl-i devlet bi'l-cümle suvâr olup tertîb-i acîb vâlâ-yı dil-firîb ile sultân-ı müşârün-ileyhâyı sarây-ı pür-behcetlerine îsâl eylediler. Cuma günü (291-a) sarây-ı müşârün-ileyhâya teşrîf-i hümâyûn âdet olduğuna binâen yevm-i mezkûrda pâdişâh-ı keremkâr ve şehriyâr-ı şefekat-âsâr salât-ı cumʿayı baʿde'l-edâ kudûm-ı mülûkâneleriyle sarây-ı müşârün-ileyhâyı matlaʿ-i ehille-i fevz ü saʿâdet ve mecmaʿ-ı vüfûd-i hayr u bereket buyurup baʿdehû sarây-ı dil-küşâ-yı cihândârîlerine avdet buyurdular.